म्हाडाच्या कोकण मंडळाची हजारो घरे धूळ खात पडली आहेत. विजेत्यांना गृहकर्ज न मिळणे हे यामागचे मुख्य कारण आहे. अशा विजेत्यांना कोणत्याही त्रासाशिवाय झटपट कर्ज मिळावे यासाठी म्हाडाने एजन्सीची नेमणूक केली आहे. चाळीसहून अधिक बँका या एजन्सीची संलग्न असल्याने विजेत्यांनाही कर्जासाठी बँकांचे उंबरठे झिजवावे लागणार नाही तसेच म्हाडाच्या शिल्लक राहिलेल्या या घरांचीदेखील हातोहात विक्री होईल, असा विश्वास म्हाडाला आहे.
म्हाडाच्या कोकण मंडळाची बोळींज (विरार), खोणी (कल्याण), शिरढोण (कल्याण), गोठेघर (ठाणे) आणि भंडार्ली (ठाणे) येथे सुमारे अकरा हजारांहून अधिक घरे विक्रीविना शिल्लक आहेत. यातील सुमारे आठ हजार घरे पंतप्रधान आवास योजनेतील आहेत. अत्यल्प आणि अल्प उत्पन्न गट असलेल्या विजेत्यांना गृहकर्ज देण्यास बँका सहजासहजी तयार होत नाहीत. कर्ज न मिळाल्याने विजेत्यांना नाइलाजास्तव घरावर पाणी सोडावे लागते. या पार्श्वभूमीवर विजेत्यांना झटपट कर्ज मिळवून देण्यासाठी एजन्सीची नेमण्यासाठी म्हाडाने निविदा प्रक्रिया राबवली होती. त्याला तीन एजन्सीने प्रतिसाद दिला होता. त्यातील टीईएनबी फिनटॅक या एजन्सीची निवड म्हाडाने केली आहे.
विजेत्यांसोबत म्हाडाचाही फायदा
एजन्सीची निवड केल्यामुळे गृहकर्जासाठी विजेत्यांना बँकांचे उंबरठे झिजवावे लागणार नाहीत. एजन्सीचे प्रतिनिधी स्वतःच विजेत्यांशी संपर्क साधून गृहकर्जाची विचारणा करतील. तसेच कोणत्या बँकेत किती व्याजदर आहे याची माहिती विजेत्यांना दिली जाईल. त्यामुळे सर्वात कमी व्याजदर असलेल्या बँकेची निवड विजेते करू शकतील. एजन्सी विजेत्यांकडून प्रोसेसिंग फी म्हणून जी रक्कम आकारेल त्यातील 15 टक्के रक्कम एजन्सी म्हाडाला देणार आहे.
