Syed Mushtaq Ali Trophy मध्ये मुंबईकर आयुष म्हात्रेने चौफेर फटकेबाजीचे प्रदर्शन करत आपल्या फलंदाजीची धार दाखवून दिली. विदर्भाचा खरपूस समाचारा घेत पठ्ठ्याने वयाच्या 18 वर्षी खणखणीत शतक ठोकलं आणि इतिहास रचला. मुंबईच्या विजयाचा शिल्पकार ठरलेल्या आयुषने आपल्या शतकासह अनेक विक्रमांवर आपल्या नावाची नोंद केली आहे. विशेष म्हणजे रोहित शर्माचा पण एक विक्रम त्याने मोडित काढला आहे.
विदर्भविरुद्ध खेळल्या गेलेल्या सामन्यात आयुष म्हात्रेने 53 चेंडूंचा सामना करत 8 चौकार 8 षटाकारांची आतषबाजी करत 110 धावांची नाबाद खेळी केली. विदर्भच्या गोलंदाजांवर आयुष 207.55 च्या स्ट्राईक रेटने बरसला. विदर्भने मुंबईला जिंकण्यासाठी 193 धावांचे आव्हान दिले होते. या आव्हानाचा पाठलाग करताना मुंबईची सुरुवात खराब झाली. अजिंक्य रहाणे (0) आणि हार्दिक तमोर (1) झटपट बाद झाल्याने मुंबईची अवस्था 21 धावांवर 2 विकेट अशी झाली होती. अशा परिस्थितीत फलंदाजीला येत आयुषने तुफान फटकेबाजी केली. त्यामुळे मुंबईने तीन गड्यांच्या मोबदल्यात आव्हानाचा यशस्वी पाठलाग केला आणि सात विकेटने सामना जिंकला. आयुष म्हात्रेच्या जोडीने शिवम दुबेची नाबाद 39 धावांची खेळीही महत्त्वपूर्ण ठरली.
हिंदुस्थानच्या पराभवाला एकटा प्रशिक्षक दोषी नाही, सुनील गावसकर यांनी केली गंभीरची पाठराखण
आयुष म्हात्रेचे हे शतक विक्रमी ठरलं आहे. आयुष म्हात्रे या शतकासह आता प्रथम श्रेणी क्रिकेट, लिस्ट-A आणि टी-20 अशा तिन्ही फॉरमॅटमध्ये शतक ठोकणारा सर्वात कमी वयाचा हिंदुस्थानी खेळाडू बनला आहे. त्याने 18 वर्ष 135 व्या दिवशी ही धडाकेबाज कामगिरी केली आहे. या बाबतीत त्याने रोहित शर्माचा 19 वर्ष 339 दिवसाचा विक्रम मोडित काढला आहे. तसेच आयुष टी-20 फॉरमॅटमध्ये वैभव सूर्यवंशी, विजय झोल यांच्यानंतर शतक ठोकणारा सर्वात कमी वयाचा तिसरा फलंदाज ठरला आहे.
मेस्सीचा हिंदुस्थानचा चौफेर दौरा; पूर्व-पश्चिम-उत्तर-दक्षिण…लिओनल मेस्सी संपूर्ण हिंदुस्थान फिरणार
आयुष म्हात्रेने गेल्या काही महिन्यांमध्ये आपल्या फलंदाजीने सर्वांना प्रभावित केलं आहे. म्हणूनच त्याची आगामी Under-19 आशिया चषकासाठी 15 सदस्यीय हिंदुस्थानी संघाच्या कर्णधारपदी निवड करण्यात आली आहे. तर उपकर्णधारपदाची जबाबदारी विहान मल्होत्राच्या खांद्यावर सोपवण्यात आली आहे. 12 ते 21 डिसेंबर दरम्यान आशिया चषकाचा थरार दुबईमध्ये रंगणार आहे.
आशिया चषकासाठी हिंदुस्थानचा 19 वर्षांखालील संघ
आयुष म्हात्रे (कर्णधार), विहान मल्होत्रा (उपकर्णधार), वैभव सूर्यवंशी, वेदांत त्रिवेदी, अभिज्ञान कुंडू (यष्टीरक्षक), हरवंश सिंह (यष्टिरक्षक), युवराज गोहिल, कनिष्क चौहान, खिलान ए. पटेल, नमन पुष्पक, डी.दीपेश, हेनिल पटेल, किशन कुमार सिंह, उधव मोहन, आरोज जॉर्ज
