शिर्डी येथील साईबाबा प्रसादालयात भाविकांना देण्यात येणारे अन्न हे प्रसाद नसून, जेवणच असल्याचा खळबळजनक दावा भाजपचे माजी खासदार सुजय विखे-पाटील यांनी पुन्हा एकदा केला आहे. विखे-पाटील यांच्या या विधानामुळे धार्मिक, सामाजिक आणि राजकीय वर्तुळात पुन्हा चर्चा पेटली असून, साईप्रसादालयाच्या सेवेवर नवा वाद निर्माण झाला आहे.
नगरपरिषद निवडणुकीच्या निमित्ताने आयोजित कॉर्नर सभेत शहरातील वाढत्या गुन्हेगारीवर भाष्य करताना त्यांनी पुन्हा एकदा साईप्रसादालयातील मोफत भोजनाचा मुद्दा उपस्थित करून वाद वाढविला आहे. काही दिवसांपूर्वी केलेल्या अशा विधानामुळे वाद वाढला होता. सुजय विखे-पाटील म्हणाले, प्रसाद म्हणजे घुगऱया आणि लापशी. भाजी, पोळी, वरण, भात देत असाल तर तो प्रसाद नसून, जेवण आहे. साई संस्थानाच्या मोठय़ा सेवेला त्यांनी खुले आव्हान दिल्याने हा मुद्दा पुन्हा ऐरणीवर आला आहे.
आपल्या विधानाबाबत ते म्हणाले, पूर्वी शिर्डीत फिरणारे सर्वजण साईभक्त नव्हते. ते भिकारी आणि गुन्हेगार होते. ते येथे जेवायचे, 500 रुपयांच्या खोलीत झोपायचे आणि सकाळी पुन्हा आपल्या कामावर निघायचे, असा दावा त्यांनी केला.
