महायुतीचे प्रमुख घटक पक्ष असणाऱया भाजप आणि शिंदे गटात गेल्या काही दिवसांपासून कलगीतुरा सुरू आहे. भाजप प्रदेशाध्यक्ष रवींद्र चव्हाण यांनी ‘जो भी है देवाभाऊही है, दोन नंबरला काही किंमत नसते’ असे म्हणत उपमुख्यमंत्री एकनाथ शिंदे यांना त्यांची जागा दाखवून दिली.
भाजपचे प्रदेशाध्यक्ष रविंद्र चव्हाण यांनी सांगलीतील विटा येथे प्रचारसभेत पुन्हा एकदा मिंध्यांना डिवचले आहे. दोन नंबरला काहीच किंमत नसते असा टोला त्यांनी यावेळी मिंध्यांना लगावला. pic.twitter.com/XMwppRPgYI
— Saamana Online (@SaamanaOnline) November 29, 2025
दोन दिवसांपूर्वी रवींद्र चव्हाण यांनी आपल्या 2 डिसेंबरपर्यंत युती टिकवायची आहे, असे वक्तव्य करत एकनाथ शिंदेंच्या विरोधातील नाराजीला वाट मोकळी करून दिली होती. त्यात पुन्हा एकदा विटामधील नगरपरिषदेच्या प्रचारसभेत ‘जो भी है देवाभाऊही है, देवाभाऊ सब का भाऊ! दोन नंबर तो दोन नंबरच असतो’ असा टोला चव्हाण यांनी आर. आर. पाटील यांच्या जुन्या भाषणाचा संदर्भ देत लगावला. यामुळे राजकीय वर्तुळात उलटसुलट चर्चा सुरू झाली आहे.
– आर. आर. पाटील म्हणाले होते, ‘मी मोठमोठी पदे भूषवली. मी नंबर एक होण्याचा प्रयत्न केला, पण नंबर एक होऊ शकलो नाही, तर नंबर दोनच राहिलो. बाबांनो, नंबर एक हा नंबर एकच असतो. नंबर दोन याला काही किंमत नसते. सांगलीत आल्यानंतर मला बरेच लोक काय काय सांगत आहेत. मी एवढेच सांगेन निदान आबांच्या भाषणावर तरी विश्वास ठेवा,’ असे रवींद्र चव्हाण म्हणाले.
