त्वचा चमकदार आणि केस मुलायम राहावेत यासाठी आपण नानाविध महागडी ब्युटी प्रोडक्ट्स वापरतो. परंतु घरच्या घरी सहज उपलब्ध असणाऱ्या अळशीच्या बिया त्वचा आणि केसांसाठी वरदान समजल्या जातात. केसांसाठी आणि त्वचेसाठी अळशीचे जेल हे फार महत्त्वाचे मानले जाते.
अळशीचे जेल बनवण्यासाठी लागणारे साहित्य
अर्धा कप अळशीच्या बिया, दोन कप पाणी, एक चमचा एलोवेरा जेल आणि एक व्हिटॅमिन ई कॅप्सूल आवश्यक आहे. एलोवेरा आणि व्हिटॅमिन ईचा वापर ऐच्छिक आहे.
एका पॅनमध्ये अळशीच्या बिया आणि पाणी घेऊन मध्यम आचेवर उकळा. मिश्रण सतत ढवळत राहा. साधारण ७ ते १० मिनिटांनी पाणी घट्ट आणि चिकट होऊ लागेल. अंड्याच्या पांढऱ्या भागासारखी रचना तयार झाल्यावर गॅस बंद करा.
मिश्रण पूर्ण थंड होण्यापूर्वी मलमलच्या किंवा सुती कापडातून गाळून जेल वेगळे करा. त्यात एलोवेरा जेल आणि व्हिटॅमिन ई मिसळा. तयार जेल स्वच्छ काचेच्या डब्यात भरून फ्रिजमध्ये ठेवा.
स्वच्छ चेहऱ्यावर जेलचा पातळ थर लावून सुमारे २० मिनिटे ठेवता येतो. त्यानंतर पाण्याने चेहरा धुवावा. संवेदनशील त्वचा असल्यास वापरण्यापूर्वी छोट्या भागावर पॅच टेस्ट करणे योग्य ठरेल.
केसांच्या मुळांपासून टोकापर्यंत अळशीचे जेल लावून ४५ मिनिटे ते एक तास ठेवता येते. त्यानंतर सौम्य शॅम्पूने केस धुवावेत. यामुळे केसांना तात्पुरती मऊपणा आणि चमक मिळण्यास मदत होऊ शकते.
मात्र, अळशीचे जेल त्वचेवरील सुरकुत्या कायमच्या दूर करते किंवा ‘नॅचरल बोटॉक्स’प्रमाणे काम करते, असा दावा करण्यासाठी ठोस वैद्यकीय पुरावा नाही. कोणत्याही घरगुती उपायाचा परिणाम व्यक्तीनुसार बदलू शकतो.
