श्रावण हा सणासुदीचा, प्रथापरंपरेचा शुभ महिना. बरेच लोक या महिन्यात भक्ती आणि शुद्धीकरण म्हणून विशेष आहाराची पद्धती पाळतात. म्हणजे या महिन्यात उपवास केला जातो तसेच मांसाहारदेखील कटाक्षाने टाळला जातो. मात्र या महिन्यामध्ये आपल्या शरीराचे न्यूट्रिशन किंवा पोषण चांगल्या पद्धतीने राखण्यासाठी काही गोष्टींची नक्कीच काळजी घ्यावी लागते.
श्रावण महिन्यात बरेच लोक उपवास किंवा व्रत पाळतात. उपवासामध्ये विशिष्ट कालावधीसाठी काही पदार्थ वर्ज्य करणे समाविष्ट असते. उपवास सामान्यतः आठवडय़ाच्या विशिष्ट दिवसांमध्ये केला जातो. अनेक जण श्रावणी सोमवारला उपवास करतात. दुसरीकडे काही लोक संपूर्ण महिना उपवास करत असतात.
सात्त्विक आहार
श्रावणात महिनाभर सहज पचण्याजोगे आणि हलके पदार्थ खाल्ले जातात. ताजी फळे, भाज्या, धान्य, दुग्धजन्य पदार्थ, सुकामेवा, सीड्स आणि हर्बल टी यांचा समावेश सात्त्विक आहारामध्ये केला जातो.
मसाल्यांचा वापर
श्रावण महिन्यात हळद, आले आणि तुळशीसारख्या औषधी वनस्पती आणि मसाल्यांचा स्वयंपाकात समावेश केल्याने जेवणाचे पौष्टिक मूल्य वाढू शकते.
संतुलित जेवण
उपवास किंवा व्रतांच्या दरम्यानदेखील जेवण संतुलित आहे का आणि ते आवश्यक पोषक तत्त्वे प्रदान करतात का, याची खात्री करणे फार महत्त्वाचे आहे. उदाहरणार्थ, उपवास करताना विविध प्रकारची फळे, भाज्या, दुग्धजन्य पदार्थ आणि शेंगदाणे समाविष्ट केल्याने पौष्टिक गरजा पूर्ण करण्यात मदत होऊ शकते.
