मुंबईच्या प्रारूप मतदार याद्यांमध्ये संभाव्य दुबार मतदार म्हणून दाखवण्यात आलेल्या मतदारांना शपथपत्र द्यावे लागणार आहे. ती छापील कोरी शपथपत्रे घरोघरी जाऊन दिली जात आहेत. त्यांचे दुबार नाव नेमके दुसऱ्या कुठे ठिकाणी आहे हेसुद्धा त्यांना सांगितले जात नाही. त्यामुळे मतदार संभ्रमात पडले असून दुबार मतदाराचे नाव कुठे आहे याची माहिती मतदारांना द्या, अशी मागणी काँग्रेसने आज निवडणूक आयुक्तांकडे केली.
मुंबई काँग्रेसच्या अध्यक्षा वर्षा गायकवाड यांच्या नेतृत्वाखालील शिष्टमंडळाने आज राज्याचे निवडणूक आयुक्त दिनेश वाघमारे यांची भेट घेऊन त्यांना यासंदर्भात निवेदन दिले. मतदार यादीत तब्बल 11 लाख दुबार मतदारांची नावे आहेत. दुबार नावांमुळे शपथपत्र द्यावे लागणार असल्याने मतदान कमी होण्याची भीती आहे. याबाबत वाघमारे यांना शिष्टमंडळाने विचारले असता ते निरुत्तर झाले.
निवडणूक आयोग, महापालिका अधिकाऱयांची आज बैठक
या शिष्टमंडळात आमदार. डॉ. ज्योती गायकवाड, अखिल भारतीय काँग्रेस सचिव सचिन सावंत, प्रवत्ते सुरेशचंद्र राजहंस, राजेश शर्मा, माजी नगरसेवक जावेद जुनेजा, अखिलेश यादव, हरगून सिंग आदी उपस्थित होते. काँग्रेसच्या शिष्टमंडळाने उपस्थित केलेल्या मुद्दय़ांवर उद्या निवडणूक आयोगाचे अधिकारी, महानगरपालिका आयुक्त, अतिरिक्त उपायुक्त, दोन उपायुक्त आणि काँग्रेसचे तीन ते चार सदस्य यांची उद्या दुपारी 3 वाजता बैठक होणार आहे.
