आयपीएलचा 18वा हंगाम RCB साठी दमदार ठरला आहे. संघाने पहिल्या सामन्यापासूनच धमाकेदार कामगिरी करत एक एक विक्रम मोडीत काढले आणि आपली विजयी घोडदौड कायम ठेवली. मुंबई इंडियन्स, चेन्नई सुपर किंग्ज सारख्या चॅम्पियन संघाना त्यांच्याच घरात जाऊन धुळ चारण्याची किमया संघाने साधली. प्ले ऑफमध्ये अगदी थाटात प्रवेश केला आणि प्ले ऑफच्या सामन्यात पंजाबचा 8 विकेटने धुव्वा उडवत संघाने 9 वर्षांनी फायनलमध्ये प्रवेश केला. विशेष म्हणजे मागच्या वर्षी आयपीएलची फायनल खेळलेले चार खेळाडू RCB च्या ताफ्यात आहेत.
IPL 2024 ची फायनल कोलकाता नाईट राडयर्स (KKR) आणि सनरायझर्स हैदराबाद (SRH) या संघांमध्ये झाली होती. या सामन्यात कोलकताना 8 विकेटने सामना जिंकत विजेतेपद पटकावले होते. यावेळी कोलकाताच्या संघात फिल सॉल्ट आणि सुयश शर्मा या खेळाडूंचा समावेश होता. हे दोघेही सध्या बंगळुरूमध्ये आहेत. त्याचबरोबर भुवनेश्वर कुमार आणि मयंक अग्रवाल हे हैदराबादच्या संघाचा भाग होते, जे यंदा बंगळुरूकडून खेळताना दिसत आहेत. हे चार खेळाडू RCB साठी महत्त्वपूर्ण ठरले आहेत. फिल सॉल्टने वेळोवेळी संघाला दमदार सुरुवात करुन दिली आहे. तसेच भुवनेश्वर कुमार आणि सुयश शर्मा यांनी सुद्धा आपल्या गोलंदाजीची झलक साखळी फेरीतील सामन्यांमध्ये दाखवली आहे. देवदत्त पडिकलच्या जागी रिप्लेसमेंट म्हणून मयंक अग्रवालला संधी मिळाली आणि त्यानेही साखळी फेरीतील शेवटच्या सामन्यात महत्त्वपूर्ण खेळी केली, त्यामुळे संघ गुणतालिकेत दुसऱ्या क्रमांकावर कायम राहिला. हे चारही खेळाडू RCB साठी आतापर्यंत तरी लकी ठरले आहेत. त्यामुळे यंदातरी RCB विजेतेपदाचा दुष्काळ संपवणार का? हे पाहण्यासाठी चाहते उत्सूक आहेत.
कळी खुलली! RCB ने फायनलमध्ये धडक मारल्यावर कॅमेरा अनुष्काकडे वळला
