अमूक एक नाव आवडते किंवा एखादे नाव आवडत नाही म्हणून स्वेच्छेने नाव बदलण्याची परवानगी देता येणार नाही, असा महत्त्वपूर्ण निर्वाळा उच्च न्यायालयाने दिला आहे.
एका मुलाने ही याचिका केली होती. या मुलाचे वडील हिंदू असून आई ख्रिश्चन होती. जन्मदाखल्यावर त्याचे नाव हिंदू पद्धतीचे आहे. शाळेच्या दाखल्यावर ख्रिश्चन नाव आहे. त्याच्या दहावीच्या व बारावीच्या रिझल्टवर ख्रिश्चन नावाची नोंद आहे. यात बदल करण्याचे आदेश न्यायालयाने दहावी व बारावी बोर्डाला द्यावेत, अशी मागणी याचिकेत करण्यात आली होती.
न्या. रवींद्र घुगे व न्या. अश्विन भोबे यांच्या खंडपीठासमोर या याचिकेवर सुनावणी झाली. आवडीनुसार नाव बदलण्यास परवानगी देता येणार नाही. मात्र या मुलाचे प्रकरण वेगळे आहे. आपले नाव काय असावे हे त्याने ठरवले होते. त्यामुळे या मुलाची मागणी मान्य केली जात आहे. दहावी व बारावी बोर्डाने त्याच्या शिक्षण प्रमाणपत्रात हिंदू नावाने बदल करावा, असे आदेश न्यायालयाने दिले आहेत.
जन्मदाखल्यावर नमूद असलेले नाव महत्त्वाचे
मुलाच्या जन्मदाखल्यावर हिंदू पद्धतीचे नाव व आडनाव आहे. शाळेत ख्रिचन पद्धतीचे नाव व आडनाव नोंदवले गेले आहे. शाळेत त्याची जात हिंदूच नमूद आहे. परिणामी जन्मदाखल्यावरील नावाप्रमाणेच त्याच्या शालेय प्रमाणपत्रावर नाव असायला हवे, असे निरीक्षण न्यायालयाने नोंदवले.
