पत्नीचे अनैतिक संबंध, नवरा बायकोमधील वाद किंवा कुटुंबाचा हस्तक्षेप यांसराख्या कारणांवरून पतीच्या हत्येचे किंवा आत्महत्येचे प्रमाण दिवसेंदिवस वाढत चालले आहे. अशातच हरयाणातील रोहतक येथे धक्कादायक घटना घडली. पत्नीने तिच्या प्रियकरासोबत एक रील व्हिडीओ बनवला आणि तो नवऱ्याला पाठवला. तो व्हिडीओ पाहून बायकोचे विवाहबाह्य संबंध असल्याचा राग त्याला अनावर झाला आणि याच नैराश्यातून गळफास घेत आपले जीवन संपवले.
मिळालेल्या माहितीनुसार, ही घटना रोहतक जिल्ह्यातील दोभ गावातील आहे. महिलेने तिच्या प्रियकरासोबतचा व्हिडिओ बनवून पतीला पाठवला तेव्हा त्याने स्वतःच्या शेतात गळफास घेऊन आत्महत्या केली. पण मरण्यापूर्वी त्याने 4 मिनिटे 2 सेकंदांचा व्हिडिओ बनवला आहे. या व्हिडीओतून त्याने आपल्या मृत्युसाठी पत्नी आणि तिच्या प्रियकराला जबाबदार धरले आहे.
आत्महत्येपूर्वी तरुणाने व्हिडिओ बनवून अनेक मोठी गोष्टी उघड केल्या. मगन असे मृत व्यक्तीचे नाव असून दिव्या असे त्याच्या पत्नीचे नाव आहे. तर दीपक असे त्याच्या पत्नीच्या प्रियकराचे नाव आहे. दीपक हा हरयाणा पोलिसात कार्यरत आहे. माझी पत्नी दिव्या आणि दीपक माझ्यावर दबाव आणत आहेत आणि माझ्याकडून वारंवार पैसे मागत आहेत. म्हणून मी टोकाचे पाऊल उचलत आहे, असे तो म्हणाला.
पत्नीच्या प्रियकराला प्रमोशनसाठी 5 लाख रुपये हवे होते. यानंतर माझ्या पत्नीने माझ्यावर दबाव आणला. या दबावाखाली मी माझी जमीन आणि काही दागिने विकले. आणि 5 लाख रुपये माझ्या पत्नीच्या खात्यात पाठवले. यानंतर दुसऱ्याच दिवशी तिने हे पैसे दीपकला पाठवले. यानंतर तिने आणखी दीड लाखांची मागणी केली. जर मी त्यांना पैसे दिले नाही तर ते माझ्या कुटुंबाला म्हणजेच माझ्या वडिलांना मारून टाकतील, अशी धमकी त्या दोघांनी मला दिली होती.
मी माझ्या वडिलांना मारू शकत नाही, त्यामुळे मीच माझे जीवन संपवत आहे, असे मृत मगनने त्याच्या व्हिडीओमध्ये म्हटले आहे. मगनच्या म्हणण्यानुसार, त्यांच्या आणि दिव्याच्या लग्नापूर्वी दिव्याचे आणखी एक लग्न झाले होते. आणि तिला एक मुलगा देखील आहे. आमच्या लग्नाच्या वेळी तिने तिच्या पूर्वाश्रमीच्या नवऱ्यासोबत घटस्फोटही घेतला नव्हता, असा धक्कादायक दावा मगनने व्हिडीओच्या माध्यमातून केला आहे.
मी माझ्या पत्नीच्या आणि तिच्या प्रियकराच्या जाचाला कंटाळून जीवन संपवत आहे. त्यामुळे माझ्यानंतर पोलिसांनी या दोघांनाही योग्य ती शिक्षा द्यावी आणि माझ्या मुलाला माझ्या कुटुंबाकडे सुपुर्द करावे, असेही मगनने व्हिडीओमध्ये आहे.
