उपमुख्यमंत्री अजित पवार यांचा मुलगा पार्थ पवार यांच्या कंपनीने कोटय़वधी रुपयांचे मुद्रांक शुल्क बुडवलेले असताना आता सनबर्न फेस्टिव्हलने राज्य सरकारचा लाखो रुपयांचा महसूल थकवल्याचा प्रकार उघडकीस आला आहे. 42 लाख 78 हजार रुपयांचे मुद्रांक शुल्क आणि गौणखनिजापोटी सुमारे 60 लाख 52 हजार असा सुमारे एक कोटी रुपयांहून अधिक रकमेचा महसूल सरकारी तिजोरीत जमा केलेला नाही. महसूल थकवलेला असताना शिवडीत 19 ते 21 डिसेंबर रोजी होणाऱ्या सनबर्न फेस्टिव्हलला परवानगी देऊन पायघड्या घातल्याचे चित्र आहे.
सनबर्न म्युझिक फेस्टिव्हलवर तरुण पिढीच्या उड्या पडतात. युवा पिढीमध्ये या फेस्टिव्हलचे प्रचंड आकर्षण आहे. तिकीटसाठी वाटेल ती किंमत मोजून या फेस्टिव्हलमध्ये सहभागी होण्याची तयार असते. या फेस्टिव्हलचे आयोजक असलेल्या ‘परसेप्ट’ व्यवस्थापनाकडून महसूल वसुलीचा मुद्दा विधानसभेतही उपस्थित झाला होता. शिवसेनेचे मुख्य प्रतोद सुनील प्रभू व भाजपचे आमदार भीमराव तापकीर यांनी यावर तारांकित प्रश्न उपस्थित केला होता. त्यावर उत्तर देताना या कंपनीकडून 1 कोटी 3 लाख 31 हजार 968 कोटी रुपये वसूल करण्यात येणार आहे असे उत्तर तत्कालीन महसूल मंत्री चंद्रकात पाटील यांनी तारांकित प्रश्नावरील उत्तरात दिले होते. पण प्रत्यक्षात या कंपनीकडून दंड वसूल करण्याचा तहसील कार्यालयाचा निर्णय प्रांत कार्यालायाने रद्द केला. पण पुढे 42 लाख 79 हजार 583 कोटी रुपयांचे मुद्रांक शुल्क वसूल करण्यासाठी राज्याच्या महसूल विभागाने नोटीसही पाठवली, पण वसुली झाली नाही.
परवानगी नसताना झाडेही तोडली
पुण्यात 2016 मध्ये झालेल्या सनबर्न फेस्टिव्हलने राज्य सरकारचे 42 लाख 79 हजार 853 रुपयांचे मुद्रांक शुल्क बुडवले. या कार्यक्रमासाठी अनधिकृतपणे उत्खनन केलेल्या गौणखनिजाचा 60 लाख 52 हजार 383 रुपयांचा महसूल सरकारला वसूल करता आलेला नाही. पुण्यातील आरटीआय कार्यकर्ते चंद्रकांत वारघडे पाटील यांनी माहितीच्या अधिकाराद्वारे मिळलेल्या तपशिलातून हा प्रकार उघडकीस आला आहे. या कार्यक्रमासाठी वन विभागाची परवानगी नसतानाही 25 ते 30 झाडे तोडल्याचा आरोप होत आहे.
