आशियाई क्रीडा स्पर्धेत हिंदुस्थानी अॅथलिट्सनी पुन्हा एकदा दमदार ठसा उमटवला. मिश्र 4 बाय 400 मीटर रिलेत पूवम्मा माचेतिरा, विशाल थेनारासु, वित्या रामराज आणि मनु थेकिनालिल या चौकडीने 3 मिनिटे 14.46 सेकंदांची वेळ नोंदवत रौप्यपदकावर कब्जा केला. एका क्षणी पिछाडीवर पडलेल्या हिंदुस्थानी संघाने जोरदार मुसंडी मारत प्रथम तिसरे स्थान गाठले आणि अखेरच्या फेरीत वेग वाढवत दुसऱया क्रमांकावर झेप घेत पदक खिशात घातले.
हिंदुस्थानी चौकडीची सुरुवात काहीशी संथ झाली होती. त्यामुळे संघाला पिछाडीवर जावे लागले. मात्र हिंदुस्थानी धावपटूंनी हार न मानता वेग वाढवला. तिसऱया स्थानावर पोहोचल्यानंतर अखेरच्या लॅपमध्ये हिंदुस्थानी खेळाडूंनी निर्णायक झेप घेतली आणि रौप्यपदक निश्चित केले. त्यांच्या या झुंजार कामगिरीमुळे हिंदुस्थानच्या अॅथलेटिक्स पदकतालिकेत आणखी एका पदकाची भर पडली.
वुशूमध्ये पहिले पदक
आशियाई क्रीडा स्पर्धेत हिंदुस्थानच्या शिलेदारांनी बुधवारी पदकांचा डबल धमाका केला. वुशूच्या आखाडय़ात नाओरेम रोशिबिना देवीने महिलांच्या 60 किलो सांडा प्रकारात रौप्यपदक पटकावत सलग तीन आशियाई स्पर्धेत पदक जिंकण्याचा ऐतिहासिक पराक्रम केला. दुसरीकडे रोइंगच्या डबल स्कल्समध्ये सतनाम सिंह आणि सलमान खान या जोडीने कांस्यपदकावर नाव कोरले.
रोशिबिनाची हॅट्ट्रिक
रोशिबिना देवीने 60 किलो सांडा प्रकारात रौप्यपदक जिंकत सलग तीन आशियाई स्पर्धेत पदक जिंपून हॅट्ट्रिक साजरी करणारी पहिली हिंदुस्थानी वुशूपटू होण्याचा मान मिळवला. 2018 च्या जकार्ता आशियाई स्पर्धेत तिने कांस्य, 2022 च्या हांगझोऊ आशियाई स्पर्धेत रौप्य आणि आता यंदाच्या आशियाई स्पर्धेत पुन्हा रौप्यपदक पटकावले.
आशियाई राऊंडअप, गुरिंदरवीर, अनिमेश उपांत्य फेरीत
हिंदुस्थानच्या गुरिंदरवीर सिंग आणि अनिमेश पुजूर पुरुषांच्या 100 मीटर शर्यतीची उपांत्य फेरी गाठली आहे. अनिमेशच्या पाठोपाठ गुरिंदरवीर सिंगनेही थेट उपांत्य फेरीसाठी पात्रता मिळवली आहे. गुरिंदरवीरने 10.38 सेकंदांची वेळ नोंदवून आपल्या हीटमध्ये दुसरे स्थान पटकावले. अनिमेशने 10.36 सेपंदांची वेळ नोंदवून आपल्या हीटमध्ये तिसरे स्थान पटकावले. ही कामगिरी उपांत्य फेरीत स्थान मिळवण्यासाठी पुरेशी होती.
कबड्डीमध्ये पुरुष आणि महिला उपांत्य फेरीत
गतविजेत्या हिंदुस्थानच्या पुरुष आणि महिला कबड्डी संघाने गुरुवारी अनुक्रमे चायनीज तैपेई आणि जपानला पराभूत करून ‘अ’ गटातील सामन्यांमध्ये अव्वल स्थान मिळवत उपांत्य फेरीत प्रवेश केला. हिंदुस्थानच्या पुरुष संघाने त्यांच्या अंतिम गट सामन्यात चायनीज तैपेईला 37-21 ने पराभूत केले, तर हिंदुस्थानी महिला संघाने यजमान जपानला 50-25 ने पराभूत करून आपल्या गटात अव्वल स्थान पटकावले.
बॅडमिंटनमध्ये लक्ष्य आणि सिंधू यांना पुढची चाल
बॅडमिंटन ड्रॉमध्ये हिंदुस्थानी खेळाडूंना वेगवेगळ्या फेऱयांमध्ये पुढची चाल देण्यात आली आहे. पुरुष एकेरीमध्ये लक्ष्य सेन आणि आयुष शेट्टी यांना पुढची चाल मिळाली आहे, तर महिला एकेरीमध्ये पी. व्ही. सिंधूदेखील थेट दुसऱया फेरीत पोहोचली आहे. उन्नती हुडाचा सामना उत्तर कोरियाच्या यू मी सॉन्गशी होईल.
भवानी देवी आणि श्रेया गुप्ता नॉकआऊट फेरीत
तलवारबाजीमध्ये भवानी देवी आणि श्रेया गुप्ता नॉकआऊट फेरीत पोहोचल्या आहेत. भवानीने पूल 4 मध्ये चौथे स्थान मिळवले, तर श्रेयाने पूल 2 मध्ये तिसरे स्थान मिळवले. श्रेयाने थेट अंतिम 16 मध्ये प्रवेश मिळवला आहे. भवानी देवीने अंतिम 32 च्या सामन्यात मंगोलियाच्या ओलेन तुग्सजारगनचा 15-8 असा पराभव करून अंतिम 16 मध्ये प्रवेश केला.
जलतरणात आर्यन नेहराला तिसरे स्थान
हिंदुस्थानच्या आर्यन नेहराने पुरुषांच्या 800 मीटर फ्रीस्टाइल फायनल बी मध्ये 8ः02.52 सेकंदांची वेळ नोंदवत तिसरे स्थान पटकावले. तो व्हिएतनामच्या गुयेन हुई होआंगपेक्षा 5.13 सेपंद मागे राहिला.
पूजा आणि अनामिका पाचव्या स्थानावर बरोबरीत
हिंदुस्थानच्या पूजा आणि अनामिका सध्या महिलांच्या हेप्टॅथलॉन उंच उडीमध्ये पाचव्या स्थानावर बरोबरीत आहेत. दोघींनीही आतापर्यंतची आपली सर्वोत्तम उडी 1.62 मीटर मारली आहे.
टेबल टेनिसमध्ये धमाकेदार सुरुवात
श्रीजा अपुला आणि सिंड्रेला दास यांनी महिला दुहेरीमध्ये आपल्या मोहिमेची दमदार सुरुवात केली. या हिंदुस्थानी जोडीने मंगोलियाच्या बोलोर-एर्डेन बटमुन्ख आणि बुरेनजारगल संजा यांचा 11-5, 11-4, 12-10 अशा सरळ गेममध्ये पराभव करून पुढील फेरीत प्रवेश केला. दिया चितळे आणि यशस्विनी घोरपडे यांनी महिला दुहेरीच्या दुसऱया फेरीत इराणी जोडीचा अवघ्या 12 मिनिटांत पराभव केला. या हिंदुस्थानच्या जोडीने हा सामना 11-2, 11-2, 11-4 असा जिंकला.
प्रणतीचे पदक हुकले
हिंदुस्थानच्या प्रणती नायकचे आर्टिस्टिक जिम्नॅस्टिक्सच्या पोल व्हॉल्ट प्रकारात पदक हुकले. प्रणतीने अंतिम फेरीत 13.100 गुण मिळवून सहावे स्थान पटकावले.
सीमाने पदकासह रचला इतिहास
हिंदुस्थानच्या सीमा पुमारीने आशियाई क्रीडा स्पर्धेत महिलांच्या दहा हजार मीटर शर्यतीत कांस्यपदक पटकावले आहे. आशियाई क्रीडा स्पर्धेत महिलांच्या दहा हजार मीटर शर्यतीत पदक जिंकणारी ती तिसरी हिंदुस्थानी खेळाडू आहे. सीमाने 32 मिनिटे 50.05 सेकंदात शर्यत पूर्ण करून तिसरे स्थान पटकावले. सीमा सुरुवातीपासूनच स्पर्धेत होती. एका क्षणी ती चौथ्या स्थानावर घसरली होती, परंतु तिने उल्लेखनीय पुनरागमन करून हिंदुस्थानला किमान कांस्यपदक मिळवून दिले. चालू आशियाई क्रीडा स्पर्धेत अॅथलेटिक्समधील हिंदुस्थानचे हे पहिले पदक आहे.
‘रोइंग’मध्येही तिरंगा फडकला
रोइंगच्या पुरुष डबल स्कल्समध्ये सतनाम सिंह आणि सलमान खान या जोडीने हिंदुस्थानला कांस्यपदक जिंपून दिले. अंतिम फेरीत या जोडीने 6 मिनिटे 13.25 सेकंदांची वेळ नोंदवली. संयम आणि उत्तम समन्वयाच्या जोरावर दोघांनी पोडियमवर स्थान मिळवले.
