गरोदर राहिल्यानंतर स्त्रियांचे वजन आणि पोटाचा आकार वाढू लागतो. पोटाचा आकार बाळाच्या वाढीवर अवलंबून असतो. बाळाची वाढ जसजशी होत जाते, तसा पोटाचा आकारही वाढू लगातो, मात्र एका तरुणीच्या बाबतीत भलतेच घडले. यामुळे तिला आणि तिच्या प्रियकराला आश्चर्याचा धक्काच बसला.
अमेरिकेत राहणारी पेटन स्टोवर (23) ही तरुणी ओमाहा येथे शिक्षिका आहे. तिला बऱ्याच दिवसांपासून थकवा आणि अशक्तपणा जाणवत होता. पेटनला जाणवणारी ही शारीरिक लक्षणे म्हणजे कामामुळे आलेला ताण आहे, असे वाटत होते. ती डॉक्टरांकडे तपासण्याकरिता गेली तेव्हा तिला ती गरोदर असल्याचे कळले. तपासणी झाल्यानंतर अवघ्या 48 तासांत तिने एका मुलीला जन्म दिला.
या घटनेबाबत तिच्या प्रियकराने सांगितले की, पेटनच्या पायाला आलेली सूज आणि शरीवरील इतर लक्षणांची डॉक्टरांनी तपासणी केली, तेव्हा तपासणीनंतर आलेल्या रिपोर्टनुसार ती गरोदर असल्याचे कळले. त्यानंतर नक्की गरोदर आहे का, हे पाहण्यासाठी तिची पुन्हा तपासणी करण्यात आली. तेव्हा पुन्हा आधीप्रमाणेच रिपोर्ट आल्यामुळे डॉक्टरांनी पेटन गरोदर असल्याचे निदान केले. काही तासांनंतर, जेव्हा तिची किडनी आणि यकृत नीट काम करणे बंद झाले, तेव्हा तिला पुन्हा रुग्णालयात आणण्यात आले आणि काही तासांतच तिने एका मुलीला जन्म दिला. तिने सी-सेक्शनद्वारे मुलाला जन्म दिला आणि त्याचे वजन फक्त 4 पौंड होते. याबाबत डॉक्टरांनी सांगितले की, पेटन स्टोव्हरला प्रीक्लॅम्पसिया आहे, जी गर्भधारणेशी संबंधित समस्या आहे.”
प्रीक्लॅम्पसिया हा उच्च रक्तदाब संबंधित विकार आहे जो गर्भधारणेदरम्यान होऊ शकतो. गर्भधारणेच्या 20 आठवड्यांनंतर हा विकार सुरू होऊ शकतो. जर एखाद्या महिलेला गर्भधारणेदरम्यान उच्च रक्तदाब असेल तर तिला प्रीक्लेम्पसियाचा धोका जास्त असतो. या अवस्थेवर उपचार न केल्यास आई आणि बालक दोघांच्याही जीवाला धोका निर्माण होऊ शकतो.
अशा अवस्थेत आईची लवकर प्रसूती करण्याचा सल्ला दिला जातो. प्रीक्लॅम्पसिया किती गंभीर आहे आणि स्त्री किती महिने गर्भवती आहे यावर प्रसूतीची वेळ अवलंबून असते. प्रसूतीपूर्वी प्रीक्लेम्पसियाच्या उपचारांमध्ये, अनेक सावधगिरी बाळगल्या जातात आणि रक्तदाब कमी करण्यासाठी औषधेदेखील दिली जातात. बाळंतपणानंतरही प्रीक्लॅम्पसिया विकसित होऊ शकतो, या स्थितीला प्रसूतिपूर्व प्रीक्लॅम्पसिया म्हणतात.
प्रीक्लेम्पसियाची लक्षणे
प्रीक्लेम्पसियाची लक्षणे स्त्रीच्या आरोग्यासोबत आणि उच्च रक्तदाबाशी निगडीत असतात. यामध्ये मूत्राद्वारे प्रथिने जास्त प्रमाणात बाहेर पडणे, किडनीचा त्रास, रक्तातील प्लेटलेट्स कमी होणे, यकृताचा त्रास, तीव्र डोकेदुखी, डोळ्यांची दृष्टी अधू होणे, श्वास घ्यायला त्रास होणे, पोटाच्या वरच्या बाजूला वेदना होणे, उलट्या किंवा मळमळ असे त्रास जाणवू शकतात. त्यामुळे गरोदरपणात उच्च रक्तदाबाचा त्रास होत असल्यास तात्काळ डॉक्टरांचा सल्ला घेणे आवश्यक आहे.
