नाशिकमधील औद्योगिक प्रदर्शनाच्या उद्घाटनावेळी घडलेल्या एका निंदनीय प्रकारामुळे मिंधे गट आणि भारतीय जनता पक्षामध्ये चांगलेच वाजले आहे. या कार्यक्रमावेळी उद्योगमंत्री उदय सामंत आणि मंत्री दादा भूसे यांच्यासमोरच भाजपच्या आमदार सीमा हिरे यांना अपमानीत करण्यात आले. यामुळे भाजप नेत्यांनी चांगलाच संताप व्यक्त केला. तुमची मंत्रीपदे आमच्यामुळे आहेत, हे विसरू नका असा थेट इशाराच भाजपने मिंधेंच्या आमदारांना दिला आहे.
भाजपचे मुख्य प्रवक्ते अजित चव्हाण यांनी नाशिकमध्ये नक्की काय प्रकार घडला या संदर्भात पोस्ट केली आहे. तसेच अन्य एका पोस्टमध्ये त्यांनी थेट मिंधे गटांच्या आमदारांना इशारा दिला आहे. नाशिकचे पालकमंत्री दादा भुसे आणि उदयोगमंत्री उदय सामंत यांना आठवण करून देतो की त्यांची पदं भारतीय जनता पक्षामुळे आहेत, अशी पोस्ट त्यांनी केली आहे.
त्यांनी आपल्या पोस्टमध्ये म्हटले की, सार्वजनिक जीवनात वावरणारे लोक किती उथळ झाले आहेत याचा अतिशय धक्कादायक प्रकार नाशिकमध्ये पाहायला मिळाला भारतीय जनता पक्षाच्या आमदार ज्या सीमाताई हिरे यांना एका अतिशय अपमानास्पद प्रकाराला सामोरे जावे लागले. सार्वजनिक कार्यक्रमांमध्ये ज्यांचा वावर अतिशय सौजन्यशील असतो. नाशिकच्या लोकप्रतिनिधींमध्ये सीमाताई या अतिशय सुसंस्कृत राजकारणी म्हणून सर्वसामान्यांना आपल्या वाटतात. अशा व्यक्तीचा झालेला अपमान नाशिककरांच्या जिव्हारी लागला आहे.
औद्योगिक प्रदर्शनाच्या उद्घाटन वेळी उद्योग मंत्री उदय सामंत, पालकमंत्री दादा भुसे यांच्या उपस्थितीत धनंजय बेळे या कायम मिरवून घेण्यासाठी पुढे-पुढे करणाऱ्या व्यक्तीने सीमाताईंना मागून धक्का दिला आणि त्या पडल्या हे स्पष्ट व्हिडीओमध्ये दिसत आहे. अनावधानाने असं होऊ शकतं, कुणाचाही कुणालाही धक्का लागू शकतो इथपर्यंत सगळं ठीक आहे…पण आपल्यामुळे कुणीतरी पडलं त्याची माफी मागणं हे सौजन्य आहे. ते साधं सौजन्यही न दाखवता उद्घाटनाच्या कार्यक्रमाला सरसवून फोटो काढून मिरवून घेण्यात हे धनंजय बेळे पुन्हा एकदा व्यस्त झाले… या ठिकाणी कार्यक्रमाला उपस्थित असलेल्या मंत्री उदय सामंत, मंत्री दादा भुसे या दोघांनीही आपल्या एका लोकप्रतिनिधी भगिनीला अशा पद्धतीने वागणूक मिळत असताना तातडीने तो कार्यक्रम थांबवून आधी दखल घेऊन त्यांची विचारपूस करायला हवी होती. मात्र असं न करता ताई तिथून निघून गेल्या तरीदेखील त्याची दखल न घेता उद्घाटन सोहळा पार पाडणाऱ्या मंडळींचा मी जाहीर निषेध करतो, असेही त्यांनी आपल्या पोस्टमध्ये म्हटले.
सार्वजनिक जीवनामध्ये वावरत असताना लोक आपल्याला पाहत असतात नाशिककरांनी तर धनंजय बेळे या स्वयंघोषित उत्सव मूर्तीवर बहिष्कार घालायला हवा इतकी संस्कारहीन संवेदनाहीन वागणूक नाशिककरांना या व्यक्तीची दिसली. आमदार सीमाताई हिरे या आमदार आहेत म्हणून नाही तर या ठिकाणी कुणीही माणूस असता तर तुमच्या माझ्यासारख्या सर्वसामान्य माणसा बरोबर देखील असं जर झालं तर ते अतिशय वाईट झाले असते. मात्र समस्त नाशिककरांच्या आदरास पात्र असलेल्या लाखो मतांनी भारतीय जनता पार्टीच्या तिकिटावर लोकप्रतिनिधी म्हणून दुसऱ्यांदा निवडून आलेल्या आमदारांचा अपमान होतो. आणि सार्वजनिक कार्यक्रमांमध्ये मंत्री बघत बसत असतील तर व्यक्ती म्हणून महाराष्ट्राच्या सार्वजनिक जीवनातील घसरणारा हा स्तर पाहून वाईट वाटत आहेच, पण पक्षाचा सह मुख्यप्रवक्ता म्हणून या प्रकाराची अतिशय गंभीर दखल घेऊन मी याचा निषेध व्यक्त करतो. राज्याचे मुख्यमंत्री एकनाथ शिंदे यांच्यापर्यंत ही नाराजी पोचवली जाईल आणि त्यांनाही झालेल्या प्रकार आवडेल असं मला वाटत नाही. राहिला प्रश्न धनंजय बेळे या व्यक्तीचा या सर्व प्रकाराला जबाबदार असणाऱ्या या या संस्कारहीन आणि मिरवून घेण्याची हौस असणाऱ्या माणसावर नाशिककरांनी बहिष्कार घालण्याची गरज आहे, असेही त्यांनी पोस्टमध्ये म्हटले.
