‘कॉपी’ या चित्रपटातून एक वेगळा आणि गंभीर विषय आपल्यासमोर आला आहे. चित्रपटाचा वर्ल्ड डिजिटल प्रीमियर 8 जानेवारी रोजी ‘अल्ट्रा झकास’ मराठी ओटीटीवर होईल. चित्रपटात ग्रामीण भागात शाळा व्यवस्थापनाकडून होणारा भ्रष्टाचाराचा उलगडा केला आहे. शिवा, प्रकाश आणि प्रिया अत्यंत हलाखीच्या परिस्थितीतून शिक्षण घेत आहेत. एकीकडे शाळेतील इतर मुले कॉपी करून परीक्षा देत आहेत, तर दुसरीकडे कित्येक मैल चालत येऊन हे गरीब त्रिकुट प्रामाणिकपणे परीक्षा देत आहे. पण त्याच वेळी शिक्षण अधिकारी कॉपीचे दृश्य बघून शाळा बंद करण्याचे आदेश देतात. पुढे काय घडते हे चित्रपटात पाहायला मिळेल. मिलिंद शिंदे, अंशुमन विचारे, कमलेश सावंत, अनिल नगरकर आदींच्या भूमिका आहेत.
