प्रसिद्ध यूटय़ुबर ध्रुव राठीने सोशल मीडियावर व्हायरल होत असलेल्या पोस्टवरून खोटय़ा दाव्यावर सडेतोड प्रत्युत्तर दिले आहे. सध्या सोशल मीडियावर एक पोस्ट व्हायरल झाली असून या पोस्टच्या दाव्यानुसार, ध्रुव राठी याचे खरे नाव बदरुद्दीन राशीद लाहौरी आहे. तसेच त्याची पत्नी जुली पाकिस्तानी नागरिक आहे. तिचे नाव जुलेखा आहे. ध्रुव राठी आणि त्याची पत्नी पाकिस्तानच्या कराचीमधील पाक आर्मीच्या सुरक्षेत दाऊद इब्राहिमच्या बंगल्यात राहतात, असा दावा करण्यात आला आहे. ध्रुव राठीला लक्ष्य करण्यासाठी ही पोस्ट टाकण्यात आली. परंतु ध्रुव राठीने या बोगस पोस्टला सडेतोड प्रत्युत्तर दिले आहे. या लोकांकडे माझ्या व्हिडीओला उत्तर देण्यासाठी कोणतेही उत्तर नाही. त्यामुळे हे लोक असे खोटे दावे करत आहेत. हे लोक किती हताश आहेत. माझ्या पत्नीच्या कुटुंबाला यात ओढत आहेत. तुम्ही या आयटी सेल कर्मचाऱयांची घृणास्पद मानसिकता पाहू शकता. ध्रुव राठीने या पोस्टला फेक न्यूज आहे, असे सांगितले.
