मोटार सायकल रॅली काढत मराठा क्रांती मोर्चाचे परळीत सरकार विरोधात आंदोलन

जालना येथे मराठा आंदोलकांवर झालेल्या अमानुष लाठीमाराच्या विरोधात मराठा समाजातील रोष वाढतांना दिसून येत आहे.गेल्या तीन दिवसांपासून मराठा क्रांती मोर्चाचे परळी तहसील समोर आंदोलन सुरू आहे.आज मराठा क्रांती मोर्चाच्या वतीने शहरात रॅली काढत सरकारचा निषेध करण्यात आला.यावेळी सरकार विरोधात जोरदार घोषणाबाजी करण्यात आली.उपविभागीय अधिकारी यांना मागण्यांचे निवेदन यावेळी देण्यात आले.

जालन्यातील आंतरवेली सराटी येथे मराठा समाजाला आरक्षण भेटावे म्हणून जरांगे पाटील आंदोलन करत आहेत. त्यांच्या आंदोलनाला पाठिंबा देण्यासाठी परळीत आज सकल मराठा समाजाच्या मोटार वतीने मोटारसायकल रॅली काढण्यात आली.या रॅलीत पूर्ण तालुक्यातून शेकडो समाजबांधवांनी सहभाग घेतला.छत्रपती शिवाजी महाराज चौक,बस स्टँड रोड,बाजार समिती,टॉवर चौक, तळ वैद्यनाथ कॉलेज समोरून तहसील कार्यालयात पोचली येथे उपविभागीय अधिकारी नम्रता चाटे यांना निवेदन देण्यात आले.

राज्य सरकार ने सर्व मराठा समाजाला कुणबी प्रमाणपत्र देण्यात यावे, आंतरवली सराटी घटनेनंतर दाखल केलेले गुन्हे मागे घ्यावेत,घटनेस जवाबदार अधिकाऱ्यांना निलंबित करावे व त्यांच्यावर गुन्हे दाखल करावेत.अशा प्रमुख मागण्या या निवेदनात केलेल्या आहेत या मागण्या दोन दिवसात मान्य न झाल्यास नागापूर येथील वाण धरणावर दि.7 सप्टेंबर पासून तीव्र आंदोलन करण्यात येईल.असे निवेदनात म्हणले आहे.

राज्य सरकारमधील मंत्र्यांच्या नावाने जोरदार घोषणाबाजी 

दरम्यान सरकार बद्दलचा तीव्र रोष दिसून आला.तहसील कार्यालय परिसरात गेल्यानंतर मराठा क्रांती मोर्चाचे कार्यकर्त्यांनी सरकारमधील मंत्र्यांच्या विरोधात जोरदार घोषणाबाजी केली. मुख्यमंत्री एकनाथ शिंदे,उपमुख्यमंत्री अजित पवार,गृहमंत्री देवेंद्र फडणवीस, अन्न व नागरी प्रशासन मंत्री छगन भुजबळ यांच्या विरोधातल्या घोषणाबाजीने तहसील परिसर दुमदुमुन गेला होता.