भारतीय जनता पक्षाने पंकजा मुंडे यांना वारंवार उमेदवारी नाकारल्याने जालन्यात पंकजा मुंडे समर्थकांच्या वतीने रविवारी गांधी चमन येथे आत्मक्लेश आंदोलन करण्यात आले. यावेळी मुंडे समर्थकांनी तब्बल 3 तास धरणे देत तोंड बडवून घेतले. तसेच यावेळी मुंडे समर्थकांनी हाताला काळ्या फिती बांधून भाजपचा निषेध केला.
डॉ. श्रीमंत मिसाळ म्हणाले की, गोपीनाथ मुंडे यांनी आपली पूर्ण हयात भाजपाला वाडी तांड्यापर्यंत पोहचवण्यात घालविली. आयुष्यभर त्यांना प्रचंड संघर्ष करावा लागला. त्यांच्या दुर्दैवी अपघातानंतर पंकजा मुंडे यांनाही तोच संघर्ष करावा लागतो आहे. त्यांना मुद्दाम अनेक ठिकाणी अडविले जात आहे, असा समाजाचा आरोप आहे. त्यांना डावलून कमी सक्षम व्यक्तींना संधी दिली जातेय आणि हे पुन्हा पुन्हा घडतेय. समाज गेल्या 40 वर्षांपासून नेहमी भाजपासोबत आहे. मात्र, असे दिसते की भाजप आमच्या समाजाच्या मुळावरच उठली आहे. यामुळे समाज फार अस्वस्थ झाला आहे. भाजपने पंकजा मुंडे यांना न्याय द्यावा, अन्यथा येणाऱ्या काळात समाज आक्रमक भूमिका घेतल्याशिवाय राहणार असा इशाराही त्यांनी दिला.
माजी नगरसेवक गणेश घुगे म्हणाले की, भारतीय जनता पार्टीकडून प्रत्येकवेळी पंकजा मुंडे यांच्यावर अन्याय होत आहे. भाजपचे विरोधी पक्षनेते देवेंद्र फडणवीस व चंद्रकांत पाटील हे जाणूनबुजून पंकजा मुंडे यांना डावलत आहेत. भारतीय जनता पक्षाने पंकजा मुंडे यांची दखल घ्यावी, अन्यथा येणाऱ्या काळात समाज आक्रमक होत रस्त्यांवर उतरल्याशिवाय शांत बसणार नाही, असे त्यांनी म्हटले.
यावेळी डॉ. श्रीमंत मिसाळ, नगरसेवक गणेश घुगे, गंगाधर वराडे , बाबासाहेब गिते, डॉ. राजीव डोईफोडे, विजयकुमार वाघ, संतोष जमधडे, ऍड. श्रीराम हुशे, महेंद्र अकोले,रवी कायंदे, बद्री वाघ, बाबासाहेब दराडे, कृष्णा दराडे, गंगाधर दराडे आदींसह पंकजा मुंडे समर्थक मोठ्या संख्येने उपस्थित होते.
