संभाजी ब्रिगेडच्या नाशिक येथे झालेल्या बैठकीत महाविकास आघाडीला पाठिंबा देण्याबाबत निर्णय घेण्यात आला. संभाजी ब्रिगेड प्रदेशाध्यक्ष प्रवीण गायकवाड यांच्या नेतृत्वाखाली ही बैठक झाली. त्यानंतर संभाजी ब्रिगेड नगर दक्षिणच्या वतीने महाविकास आघाडीचे उमेदवार निलेश लंके यांची भेट घेत त्यांना पाठिंबा देण्यात आला. त्यावेळी त्यांना महात्मा फुले लिखित शेतकऱ्यांचे आसूड हे पुस्तक भेट देण्यात आले.
महाविकास आघाडीचे उमेदवार निलेश लंके यांनी संभाजी ब्रिगेडच्या पदाधिकाऱ्यांशी विविध प्रश्नांवर चर्चा केली. तसेच शेतकऱ्यांच्या समस्या सोडवण्यासाठी नेहमी लढत राहणार असल्याचे सांगितले. साकळाई पाणी प्रश्न सोडविणार असून शेतकऱ्यांच्या कांदा, दूध, कापूस, सोयाबीन यासारख्या पिकांना हमीभाव आणि शेतकऱ्यांना स्वामीनाथन आयोगा लागू करण्यासाठी प्रयत्न करणार असल्याचे लंके यांनी संभाजी ब्रिगेडच्या पदाधिकाऱ्यांना सांगितले.
नगर दक्षिण मधील संभाजी ब्रिगेडचे सर्व पदाधिकारी आणि कार्यकर्ते निलेश लंके यांचा प्रचार करून त्यांना प्रचंड मतांनी विजयी करणार असल्याचे संभाजी ब्रिगेडच्या वतीने सांगण्यात आले. यावेळी संभाजी ब्रिगेडचे अनेक पदाधिकारी उपस्थित होते.
