मुंबईवर 26/11 रोजी करण्यात आलेल्या दहशतवादी हल्ल्यामध्ये दहशतवादी अजमल कसाब याला जिवंत पकडण्यासाठी शहीद तुकाराम ओंबळे यांनी प्रयत्नांची पराकाष्ठा केली होती. अशा या जिगरबाज तुकाराम ओंबळे यांना एका तरुणाने अनोखी मानवंदना दिली आहे. ध्रुव प्रजापती असं या तरुणाचे नाव असून तो कोळ्यांच्या नव्या प्रजाती शोधून काढण्यासाठी धडपडत असतो. अहमदाबाद येथील कोळी संशोधक ध्रुव प्रजापतीने महाराष्ट्रात कोळ्यांच्या दोन प्रजाती शोधून काढल्या आहेत. त्यापैकी एका प्रजातीला त्याने शहीद तुकाराम ओंबळे यांचे नाव दिले आहे.
1/2
Join me to introduce 2 new species of jumping spiders from Maharastra, India!
One species is dedicated to ASI Tukaram Omble, who coughed terrorist Kasab alive and took 23 bullets.
Presenting Icius tukarami from Thane, Maharashtra.@MumbaiPolice @arunbothra @ipskabra @IndiAves pic.twitter.com/CmirKBbmcL— Dhruv Prajapati (@Dhruv_spidy) June 27, 2021
ध्रुवला सापडलेला नव्या प्रजातीच्या कोळ्याला त्याने Icius tukarami (आयसीयस तुकारामी) असं नाव दिलं. तसेच दुसऱ्या प्रजातीला ध्रृवने आपला मित्र कमलेश चोळके याच्या स्मरणार्थ Phintella cholkei (फिन्टेला चोलकी) हे नाव दिलं आहे. कमलेशचे गेल्या वर्षी निधन झाले होते.
‘महाराष्ट्रात कोळ्यांच्या दोन नव्या प्रजातींचा शोध लावला. यापैकी कोळ्याची एक प्रजात शहीद तुकाराम ओंबळे यांना समर्पित करण्यात येत आहे’ कोळ्याची ही प्रजात ठाणे जिल्ह्यातील कल्याणमधल्या ग्रामीण भागात सापडली आहे. या कोळ्यांची प्रजात त्यांच्या पंखावरील पांढऱ्या रंगाचे पट्टे आणि अनोख्या आकारामुळे सहज ओळखता येते’ अशी माहिती ध्रृव प्रजापतीने दिली आहे.
ध्रृवचे कोळ्यांच्या नव्या प्रजातींसंदर्भातले संशोधन एका रशियन मासिकात प्रसिद्ध करण्यात आले होते. त्यानंतर त्याने शोधलेल्या कोळ्यांच्या प्रजातीला Icius Tukarami आणि Phintella cholkeiही नावे दिली गेली. छोट्या आकाराचे हे कोळी निसर्गातील जैविविधता टिकवून ठेवतात. यामुळे वातावरण चांगले राहायला मदत होते. प्रदूषणावर नियंत्रण मिळवण्याकरिता या किटकांची मदत होते असं ध्रुवने सांगितलं आहे.
