सामना प्रतिनिधी । नगर
गेल्या आठवड्यापासून जिल्ह्यात गाळप हंगामाला सुरुवात झाली असून, तेरा साखर कारखान्यांनी आठ दिवसांत 6 लाख 68 हजार टन उसाचे गाळप करत 5 लाख 47 हजार क्विंटल साखरेचे उत्पादन घेतले आहे. उर्वरित दहा कारखाने दिवाळीनंतर गाळप हंगामाला सुरुवात करणार आहेत. त्यानंतर गाळप हंगामाला वेग येणार आहे. राज्यात एक नोव्हेंबरपासून गाळप हंगामाला सुरुवात झाली. राज्यभरात 103 साखर कारखान्यांनी गाळप हंगाम सुरू केला असून, आतापर्यंत 18 लाख टन उसाचे गाळप करत 10 लाख क्विंटल साखर निर्मिती केली. त्यात नगर जिल्ह्यातील साडेपाच लाख क्विंटल साखर आहे.
अंबालिका कारखान्याने सर्वाधिक एक लाख 18 हजार टन उस गाळप करत एक लाख 9 हजार क्विंटल साखर निर्मिती केली आहे. या कारखान्यांचा सरासरी साखर उतारा साडेनऊ टक्के आहे. कुकडी कारखान्याने 37 हजार, नागवडे कारखान्याने 40 हजार 850, अगस्ती कारखान्याने 43 हजार 200, थोरातने 68 हजार 870, विखे कारखान्याने 17 हजार, ज्ञानेश्‍वरने 43 हजार 500, मुळा कारखान्याने 23 हजार 350, कर्मवारी काळे कारखान्याने 31 हजार 400, कोल्हे कारखान्याने 23 हजार क्विंटल साखर उत्पादन केले आहे. दिवाळी सणामुळे दोन दिवस उसतोडणी कामगारांच्या कमी उपस्थितीमुळे दैनंदिन गाळप कमी होईल. काही दिवस सुट्ट्यानंतर मात्र गाळपाला वेग येणार आहे.
