माहीम येथे रविवारी रात्री झालेल्या दुचाकी अपघातात दोघा तरुणांचा मृत्यू, तर एक तरुण गंभीर जखमी झाल्याची घटना घडली. जखमी तरुणाला केईएम इस्पितळात दाखल करण्यात आले असून त्याची प्रकृती चिंताजनक असल्याचे समजते.
भावेश, निलेश आणि विकास हे तिघे रविवारी रात्री साडेअकराच्या सुमारास माहीमहून दादरच्या दिशेने दुचाकीवरून ट्रिपलसीट जात होते. दरम्यान, सेनापती बापट मार्गावरून जात असताना एका खासगी शाळेसमोर चालकाचे वेगात असलेल्या दुचाकीवरील नियंत्रण सुटले. त्यामुळे सुसाट दुचाकी रस्त्याच्या कडेला उभ्या असलेल्या बसवर जाऊन आदळली. ही धडक इतकी जोरदार होती की, त्यात तिघांच्या डोक्याला गंभीर दुखापत झाली. भावेश (25) आणि निलेशचा (24) जागीच मृत्यू झाला, तर विकासची प्रकृती चिंताजनक आहे. निलेश दुचाकी चालवत होता व त्याने हेल्मेट घातले नव्हते असे समजते. घटनास्थळी दोन मोबाईल सापडले असून तेही अपघातामुळे फुटलेले होते. याप्रकरणी माहीम पोलीस अधिक चौकशी करीत आहेत.
