सामना प्रतिनिधी, मुंबई
राज्यातील तब्बल 82 लाख 27 हजार शेतकरी दुष्काळाच्या कचाटय़ात सापडले असून 85 लाख 76 हजार हेक्टर क्षेत्र दुष्काळाने बाधित झाल्याची माहिती मुख्यमंत्री देवेंद्र फडणवीस यांनी विधानसभेत दिली. सगळ्यांनीच दुष्काळावर मात करण्यासाठी सहकार्य करण्याचे आवाहन त्यांनी केले.
विधानसभेत नियम 293 अंतर्गत विरोधक आणि सत्ताधाऱ्यांनी मांडलेल्या दुष्काळाच्या चर्चेदरम्यान उपस्थित केलेल्या मुद्दय़ांवर उत्तर देताना ते बोलत होते. केंद्राने तयार केलेल्या दुष्काळ संहितेमुळे दुष्काळ जाहीर करण्याच्या प्रक्रियेत सुलभता आणि अचुकता आली आहे. सध्या जाहीर केलेले दुष्काळी क्षेत्र हे अंतिम नसून दुष्काळ जाहीर करण्याच्या मागण्यांवर विचार करण्यासाठी मंत्रिमंडळाची एक उपसमिती तयार करण्यात आली आहे. या उपसमितीकडे आलेल्या प्रस्तावांची पाहणी करून नुकसानीचे दावे योग्य असल्यास नियमानुसार तीव्र किंवा मध्यम स्वरूपाचा दुष्काळ जाहीर केला जाईल, असेही त्यांनी सांगितले.
