बॉलीवूडचे बिग बी अमिताभ बच्चन आणि साऊथ सुपरस्टार रजनीकांत या दोन महानायकांची नुकतीच मुंबईत ग्रेट भेट झाली. निमित्त होते ते आगामी ‘वेट्टैयन’ या चित्रपटाच्या सध्या मुंबईत सुरू असलेल्या शूटिंगचे. या चित्रपटाच्या निमित्ताने हे दोन्ही सुपरस्टार तब्बल 32 वर्षांनी एकत्र झळकणार आहेत. यापूर्वी 1991 मध्ये रिलीज झालेल्या ‘हम’ या चित्रपटात दोघेही शेवटचे एकत्र दिसले होते.
ज्येष्ठ अभिनेते अमिताभ बच्चन यांनी त्यांच्या ब्लॉगवर या भेटीची काही छायाचित्रेही शेअर केली आहेत, ज्यात दोन्ही कलाकारांनी सूट परिधान केला असून एकमेकांची गळाभेट घेताना दिसत आहेत. ‘वेट्टैयन’ हा रजनीकांत यांचा 170 वा चित्रपट असून यात बिग बी पाहुण्या कलाकाराच्या भूमिकेत आहेत. याच वर्षी ऑक्टोबरला हा चित्रपट प्रदर्शित होणार आहे.
रजनीकांत अजूनही डाऊन टू अर्थ
रजनीकांत यांच्यासोबत काम करण्याचा अनुभव शेअर करताना बिग बी आपल्या ब्लॉगमध्ये म्हणाले, ‘रजनीकांत यांच्यात किंचितही बदल झालेला नाही. तोच नम्र, साधा आणि डाऊन टू अर्थ डायनॅमिक स्टार…त्यांच्यासोबत काम करणे माझ्यासाठी सन्मानाची गोष्ट आहे.’
