शिर्डीला दर्शनासाठी जात असताना समृद्धी महामार्गावर कारचे टायर फुटल्याने भीषण अपघाताची घटना शनिवारी सकाळी बुलढाण्यात घडली. या अपघातात दोघांचा मृत्यू झाला असून 13 जण जखमी झाले आहेत. माळसावरगाव येथे मुंबई कॅरिडोरच्या 344.7 क्रमांकाच्या चायनिज पॉईंटजवळ हा अपघात झाला.
यवतमाळ जिल्ह्यातील आसेगाव देवी (तालुका बाभुळगाव) येथील भाविक क्रूझर गाडीने शिर्डी येथे दर्शनासाठी निघाले होते. मात्र, वाटेतच त्यांच्या वाहनाचा टायर फुटल्याने गाडी अनियंत्रित होऊन महामार्गावर उलटली. यादरम्यान मागून भरधाव वेगात येणार्‍या क्रेटा कारने क्रूझरला जोरदार धडक दिली.
या अपघातात विद्याबाई साबळे (55) आणि मोतीराम बोरकर (60) यांचा मृत्यू झाला. तर 13 जण जखमी झाले असून तिघांची प्रकृती गंभीर आहे. भावना रमेश राऊत (30), प्रतिभा अरुण वाघोडे (45), मीरा गोटफोडे (65), संतोष साखरकर (28), कमला जाधव (55), सुशिला जाणार (52), मीरा राऊत (60), छायाबाई चव्हाण (65), प्रमिला घाटोळ (60), भक्ती राऊत (5), रमेश राऊत (40), बेबीबाई येलोत (60) अशी जखमींची नावे आहेत.
अपघाताची माहिती मिळताच महामार्ग पोलीस, सिंदखेडराजा पोलीस ठाण्याचे कर्मचारी, तसेच ‘क्यूआरव्ही टीम’ घटनास्थळी दाखल झाली. महामार्ग पोलीस पीएसआय गजानन उज्जैनकर आणि त्यांच्या टीमने जखमींना रुग्णालयात दाखल केले. तसेच महाराष्ट्र सुरक्षा बलाच्या पथकाने मृतदेह बाहेर काढून वाहने महामार्गाच्या बाजूला हलवल्यानंतर वाहतूक सुरळीत करण्यात आली.
