महाराष्ट्रात सोमवारपासून संचारबंदी लागू करण्याचा निर्णय मुख्यमंत्री उद्धव ठाकरे यांनी घोषित केला आहे. ‘महाराष्ट्र करोनच्या धोकादायक उंबरठ्यावर आहे. बिकट परिस्थिती आणायची नसेल तर सरकारचे निर्देश काटेकोरपणे ऐका’, असे आवाहन मुख्यमंत्र्यांनी केले आहे. राज्यातील प्रत्येक जिल्ह्याच्या सीमा करण्याचे आदेशही मुख्यमंत्र्यांनी दिले आहेत. संचारबंदीदरम्यान रस्त्यावर 5 पेक्षा अधिक लोकांनी एकत्र येऊ नये, असे आदेश मुख्यमंत्र्यांनी दिले आहेत. यादरम्यान जीवनावश्यक वस्तू, अन्नधान्य तसंच इतर आवश्यक सेवा सुरु राहतील, अशी माहिती मुख्यमंत्र्यांनी दिली आहे. विषाणूचा प्रादुर्भाव होऊ नये म्हणून नाईलाजाने संचारबंदी लागू करावी लागत असल्याचे मुख्यमंत्री ठाकरे म्हणाले आहेत. माझा विश्वास आहे आपण सगळे मिळून या संकटावर मात करू, असेही मुख्यमंत्री म्हणाले आहेत.
Today I am compelled to announce a statewide curfew. People were not listening and we are compelled: Maharashtra CM Uddhav Thackeray #CoronavirusPandemic pic.twitter.com/BkVJ23qOOb
— ANI (@ANI) March 23, 2020
वाहतूक बंद
खासगी वाहने अत्यावश्यक कारणांसाठीच सुरु राहतील असे मुख्यमंत्री उद्धव ठाकरे यांनी सांगितले. तसेच रिक्षा, टॅक्सी मधील प्रवाशांची संख्या मर्यादित असेल. खासगी वाहनेही फक्त अत्यावश्यक सेवेसाठीच सुरू राहतील. टॅक्सीमध्ये एक चालक आणि दोन प्रवासी तर रिक्षामध्ये एक चालक आणि एक प्रवासी असतील असे मुख्यमंत्री उद्धव ठाकरे म्हणाले
राज्यातले जिल्हे विलग
काल आपण इतर राज्याच्या सीमा बंद केल्या होत्या आज आपण राज्यातील जिल्ह्यांच्या सीमा देखील बंद करीत आहोत, असे उद्धव ठाकरे म्हणाले. राज्यातील अनेक असे जिल्ह्यात हा विषाणू पसरला नाही. तो पसरू नये म्हणून आपण आता जिल्ह्यांच्या सीमाही बंद करण्याचा निर्णय घेतला आहे.
विमानतळ बंदीसाठी पंतप्रधानांना विनंती
देशांतर्गत विमानतळ तत्काळ बंद करावे अशी विनंती मी पंतप्रधानांना केली आहे असे मुख्यमंत्री उद्धव ठाकरे म्हणाले. राज्यात मुंबई, नागपूर, संभाजीनगर, शिर्डी असे आंतरराष्ट्रीय विमातनतळ आहेत ती बंद करण्यासाठी आपण पंतप्रधान मोदींशी पत्रव्यवहार केला आहे असे उद्धव ठाकरे म्हणाले.
फक्त जीवनावश्यक वस्तूंसाठी वाहतूक सुरू
जीवनावश्यक वस्तू, औषधे, अन्न धान्य तसेच त्यांची ने आण करणारी वाहने सुरु राहतील असे मुख्यमंत्री उद्धव ठाकरे यांनी स्पष्ट केले. तसेच पशू खाद्य मिळेल, पशूंचे दवाखानेही उघडे राहतील, कृषीमालाशी सबंधित वाहतूक सुरु राहील असेही मुख्यमंत्री ठाकरे म्हणाले.
