चहा, कॉफी, मिठाई, शीतपेय किंवा इतर गोड पदार्थांमधून दिवसातून किती साखर शरीरात जाते, याकडे अनेकजण दुर्लक्ष करतात. मात्र सतत आणि जास्त प्रमाणात साखर खाण्याचा परिणाम केवळ वजन किंवा रक्तातील साखरेवरच होत नाही, तर त्याचा परिणाम त्वचेवरही होऊ शकतो. त्वचेचा घट्टपणा, लवचिकता आणि तरुण दिसण्यासाठी कोलेजन हे प्रथिन महत्त्वाची भूमिका बजावते. मात्र शरीरात साखरेचे प्रमाण जास्त असल्यास ती प्रथिनांशी संलग्न होऊन ‘ग्लायकेशन’ची प्रक्रिया वाढवू शकते. यामुळे त्वचेतील कोलेजन आणि इलास्टिनच्या गुणवत्तेवर परिणाम होण्याची शक्यता असते.
जास्त साखरेमुळे तयार होणारी हानिकारक संयुगे कोलेजनला कमकुवत आणि कडक करू शकतात. परिणामी त्वचेची लवचिकता कमी होण्याची शक्यता असते.
जास्त साखरेशी संबंधित ग्लायकेशन आणि ऑक्सिडेटिव्ह स्ट्रेस यामुळे त्वचेच्या वृद्धत्वाची प्रक्रिया वेगाने होण्यास हातभार लागू शकतो. त्याचा परिणाम फाइन लाइन्स, सुरकुत्या आणि त्वचा सैल होण्याच्या स्वरूपात दिसू शकतो.
अतिरिक्त साखरेचे सेवन शरीरातील दाहक प्रक्रियांशी संबंधित असू शकते. त्यामुळे त्वचेचे आरोग्यही प्रभावित होऊ शकते. अतिरिक्त साखरेचे सेवन मर्यादित ठेवणे महत्त्वाचे आहे. मिठाई, गोड पेये, बिस्किटे, केक आणि प्रक्रिया केलेल्या पदार्थांमधील अतिरिक्त साखरेचे प्रमाण कमी करणे फायदेशीर ठरू शकते.
त्वचा निरोगी ठेवण्यासाठी संतुलित आहार, पुरेसे पाणी, नियमित झोप, व्यायाम आणि योग्य स्किनकेअर रूटीन यांचाही महत्त्वाचा वाटा असतो.
त्यामुळे त्वचेचा ग्लो टिकवायचा असेल तर महागड्या स्किनकेअरसोबत ताटात किती साखर जाते, याकडेही लक्ष द्या.
