अलास्कामध्ये चीन आणि अमेरिकेच्या उच्चपदस्थ अधिकाऱ्यांमध्ये बैठक झाली. या बैठकीमध्ये दोन्ही देशांच्या अधिकाऱ्यांमध्ये जबरदस्त खडाजंगी झाल्याचे वृत्त आहे. रॉयटर्स या वृत्तसंस्थेने याबाबतची बातमी दिली आहे. या बातमीत म्हटलंय की सार्वजनिक मंचावर दोन शक्तिशाली देशांच्या अधिकाऱ्यांमध्ये अशा पद्धतीची खडाजंगी होणं ही दुर्मिळ गोष्ट आहे. चीनने अमेरिकेवर आरोप केला आहे की तो अन्य देशांना चीनवर हल्ला करण्यासाठी भडकावत आहे. चीनच्या या आरोपांना इन्कार करताना अमेरिकेने हे आरोप बिनबुडाचे असल्याचं म्हटलंय. जो बायडेन हे सत्तेत आल्यानंतर चीन आणि अमेरिकेमध्ये पहिल्यांदाच ही बैठक होत आहे. या दोन देशांतील संबंध गेल्या काही वर्षांपासून कमालीचे ताणले गेलेले आहेत. या पार्श्वभूमीवर ही बैठक महत्वाची मानली जात होती.
