हिंदुस्थान- चीन सीमेवरील परिस्थिती गंभीर असून अनेक बैठका होऊनही यावर तोडगा निघालेला नाही. अशातच गेल्या 20 दिवसात एलएसीवर गोळीबाराच्या तीन घटना घडल्याने इतक्यात तणाव निवळण्याची शक्यता नाही. गेल्या 45 वर्षात पहिल्यांदाच चीन सीमेवर गोळीबार झाला आहे. त्यामुळे येथील परिस्थिती गंभीर असल्याचे लष्करप्रमुख जनरल एम.एम. नरवणे यांनी स्पष्ट केले आहे.
‘एएनआय’ने दिलेल्या वृत्तानुसार, हिंदुस्थान-चीन सीमेवर तणाव असताना 29 ते 31 ऑगस्ट दरम्यान पहिल्यांदा गोळीबाराची घटना घडली. पैंगोंग त्सो सरोवराच्या दक्षिण भागात महत्वाच्या टेकड्यांवर हिंदुस्थानने नियंत्रण मिळवले. हिंदुस्थानचे सैनिक उंचावर बसल्याने चिनी सैन्य त्यांच्या टप्प्यात आले. यामुळे बिथरलेल्या चिनी सैनिकांनी हिंदुस्थानी जवानांकडे आगेकूच केली. यादरम्यान हवेत गोळीबार करण्यात आला. गोळीबारची दुसरी घटना 7 सप्टेंबरला मुखपारी टेकडीजवळ घडली.
तिसरी घटना 8 सप्टेंबरला पैंगोंग त्सो सरोवराच्या उत्तरी किनाऱ्यावर घडली. यात दोन्ही देशांच्या जवानांनी 100 हुन अधिक राउंड फायर केल्याने परिस्थिती गंभीर झाली. चिनी सैन्याने हिंदुस्थानी चौक्याकडे आगेकूच केल्याने इशाऱ्यासाठी हवेत गोळीबार करण्यात आला. चिनी सैनिकांच्या आक्रमक व्यवहारामुळे ही घटना घडल्याचे, सैन्याच्या सुत्रांनी सांगितले.
Three firing incidents between India-China in last 20 days in Eastern Ladakh
Read @ANI Story | https://t.co/wzR3TbUozp pic.twitter.com/OJZjRbqrY7
— ANI Digital (@ani_digital) September 16, 2020
विशेष म्हणजे गोळीबाराच्या घटना अशावेळी घडल्या जेव्हा हिंदुस्थानचे परराष्ट्र मंत्री एस. जयशंकर शांघाय सहकार्य संघटनेत भाग घेण्यासाठी मॉस्को येथे गेले होते. येथे त्यांनी चीनच्या परराष्ट्र मंत्र्यांशी चर्चा करत तणाव कमी करण्यासाठी पाच सूत्री कार्यक्रमावर सहमती दर्शवली. मात्र एकीकडे चर्चा आणि दुसरीकडे सीमेवर आक्रमक व्यूहरचना असा खेळ चीन करत आहे. चीनला उत्तर म्हणून हिंदुस्थाननेे देखील तयारी केली असून हत्यारांसह जवानांसाठी आवश्यक कपडे, रसद पोहोचवण्यात आली आहे. मात्र अनेक ठिकाणावर दोन्ही देशांचे सैन्य फायरिंग रेंजमध्ये असल्याने हा वाद बराच खेचला जाणार हे पक्के आहे.
