देशाचे मुख्य निवडणूक आयुक्त ज्ञानेश कुमार यांच्या राजीनाम्यासाठी दिल्लीत आजही आंदोलन करण्यात आले. कॉक्रोच जनता पार्टीच्या नेत्यांनी गनिमी कावा करत जंतरमंतरवर धडक दिली. तिरंगा उंचावून ज्ञानेश कुमार यांच्याविरोधात घोषणाबाजी सुरू केली. त्यानंतर सीजेपीचे नेते अजिंक्य शिंदे, सौरभ दास आणि आशुतोष रांका यांना पोलिसांनी ताब्यात घेतले. त्याचवेळी काही विद्यार्थी संघटनांनीदेखील आंदोलन सुरू केले. ते मोडून काढताना दिल्ली पोलिसांनी पुन्हा बळाचा वापर करत विद्यार्थ्यांचा गळा पकडल्याचा धक्कादायक प्रकार घडला.
दिल्लीत ‘एनएसयूआय’ या विद्यार्थी संघटनेने राजीव चौक मेट्रो स्थानकाबाहेर अचानक आंदोलन सुरू केले. संघटनेचे राष्ट्रीय अध्यक्ष विनोद जाखड यांच्या नेतृत्वात आंदोलनाला सुरुवात झाली. अचानक शेकडो कार्यकर्ते रस्त्यावर उतरले. त्यांना रोखण्यासाठी पोलिसांनी बळाचा वापर केला. अनेक कार्यकर्त्यांना ताब्यात घेण्यात आले. काही विद्यार्थ्यांचा चक्क गळा पकडून पोलिसांच्या गाडीत डांबण्यात आले. काही जणांना तर पोलिसांनी अक्षरशः खांद्यावर उचलून गाडीत कोंबले. या सर्व प्रकाराचा एनएसयूआयने निषेध केला आहे.
पोलिसांच्या ठाण्यासमोर निदर्शने
राजीव मेट्रो स्थानकाजवळ पुकारलेल्या आंदोलनादरम्यान एनएसयूआयच्या महिला सदस्याला केस धरून निर्दयीपणे ओढत बसमध्ये डांबल्याचा आरोप संघटनेने केला आहे. अशा प्रकारे आंदोलकांना पकडून नेल्याविरोधात पॅराडाईज प्लेस (किंवा संबंधित पोलीस ठाणे) पोलीस ठाण्याबाहेर एनएसयूआयच्या कार्यकर्त्यांनी निदर्शने केली. लोकशाही वाचवण्यासाठी आवाज उठवणाऱ्या विद्यार्थ्यांना अशी अमानुष वागणूक देताना तुम्हाला लाज नाही वाटली का, असा सवाल एनएसयूआयने केला आहे.
पोलिसांना हुलकावणी
दिल्ली पोलिसांनी आंदोलनासाठी अधिकृत ठिकाणांच्या यादीतून जंतरमंतरचे नाव हटविले. त्यानंतर आज त्याच ठिकाणी आंदोलन करण्याचा इशारा सीजेपीकडून देण्यात आला होता. आज सकाळी अजिंक्य शिंदे, सौरभ दास आणि आशुतोष रांका हे पोलिसांना हुलकावणी देत जंतरमंतरवर धडकले. पोलिसांनी या ठिकाणी मोठ्या प्रमाणात बॅरिकेडिंग केले आहे; मात्र त्यांनी बॅरिकेड्सवरून उड्या मारल्या आणि जंतरमंतरवर आंदोलन सुरू केले. त्यावेळी पोलिसांनी त्यांना ताब्यात घेतले.
