दिल्लीतील एका सरकारी शाळेत 12वीत शिकणाऱ्या 17 वर्षीय विद्यार्थिनीने कथितरीत्या स्वतःला आग लावून आत्महत्या केल्याची धक्कादायक घटना समोर आली आहे. ही घटना शाहदरा जिल्ह्यातील कृष्णा नगर परिसरात घडल्याची माहिती आहे. विद्यार्थिनी शाळेत एका बाटलीत रासायनिक पदार्थ किंवा पेट्रोलसदृश ज्वलनशील पदार्थ घेऊन आल्याचा प्राथमिक अंदाज व्यक्त केला जात आहे. या घटनेत विद्यार्थिनीचा मृत्यू झाला आहे. तिच्याकडे तीन पानांची सुसाइड नोट आढळल्याचेही सांगितले जात आहे.
दिल्ली पोलिसांच्या माहितीनुसार, घटनेची माहिती मिळताच पोलीस, अग्निशमन दल आणि गुन्हे अन्वेषण पथक घटनास्थळी दाखल झाले. शाळेच्या परिसरात तपास सुरू करण्यात आला असून, विद्यार्थिनीच्या मृत्यूमागील कारणांचा शोध घेतला जात आहे.
पोलिसांनी दिलेल्या माहितीनुसार, शाळेतील सुरक्षा रक्षकांच्या खोलीच्या मागील बाजूस 12वीची विद्यार्थिनी जळालेल्या अवस्थेत आढळली. प्राथमिक तपासादरम्यान तिच्या शाळेच्या बॅगेतून काही वस्तूही जप्त करण्यात आल्या आहेत. विद्यार्थिनीने स्वतःला आग लावण्यासाठी नेमका कोणता पदार्थ वापरला, तसेच तिच्या मृत्यूमागील कारण काय आहे, याचा तपास पोलीस करत आहेत.
दरम्यान, शाहदरा परिसरातील या घटनेवर स्थानिक आमदार अनिल गोयल यांनी प्रतिक्रिया दिली आहे. ही अत्यंत दुर्दैवी घटना असल्याचे सांगत त्यांनी विद्यार्थिनीने आत्महत्या का केली, हे तपासातून स्पष्ट होईल, असे म्हटले. पोलीस या प्रकरणाचा तपास करत असून, विद्यार्थिनीचा मृतदेह शवविच्छेदनासाठी पाठवण्यात आल्याची माहितीही त्यांनी दिली.
या प्रकरणात विद्यार्थिनीच्या मृत्यूमागील नेमके कारण, तिच्याकडे सापडल्याचे सांगितले जात असलेल्या तीन पानांच्या सुसाइड नोटमधील मजकूर आणि बॅगेतून जप्त केलेल्या वस्तूंचे स्वरूप याबाबत अधिकृत तपशील अद्याप समोर आलेला नाही. पोलिसांच्या तपासानंतरच या घटनेमागील परिस्थिती स्पष्ट होणार आहे.
