दोन महिन्यांपूर्वी नेरूळ भागातून बेपत्ता झालेल्या सचिन गर्जे या तरुणाचा तपास करत असताना त्याची हत्या झाली असल्याचे पोलीस तपासात पुढे आले आहे. गव्हाण येथील कुख्यात गुन्हेगार विकी देशमुख व त्याच्या साथीदारांनी निघृण हत्या करून त्याचा मृतदेह चिरनेरच्या जंगलात जाळून पुरावा नष्ट करण्याचा प्रयत्न केल्याचा प्रकार उघडकीस आला आहे. बुधवार ता. 27 रोजी नवी मुंबई गुन्हे शाखेचे पोलीस तपास करत करत चिरनेरच्या जंगलात आले होते.
नवी मुंबई पोलिसांच्या गुन्हे शाखेने बेपत्ता सचिन गर्जे या तरुणाचा शोध घेण्यास सुरुवात केल्यानंतर काही आरोपी पोलिसांच्या हाती लागले. त्यानंतर या हत्या प्रकरणाचा उलगडा झाला. नवी मुंबई पोलिसांच्या गुन्हे शाखेने या हत्या प्रकरणात सहभागी असलेल्या तिघांना अटक केली आहे. या हत्या प्रकरणातील मुख्य गुन्हेगार विकी देशमुख फरार असल्याने त्याच्या अटकेनंतर या हत्या प्रकरणामागील कारण स्पष्ट होईल, असे गुन्हे शाखेचे पोलिस उपायुक्त प्रवीण पाटील यांनी सांगितले.
सचिन नेरूळ सेक्टर-28 भागात राहण्यास होता. 14 सप्टेंबर रोजी रात्री तो उरण येथे मित्राला भेटून येतो, असे सांगून निघून गेला होता. त्यानंतर परतला नाही. कुटुंबियांनी तीन दिवसांनंतर तो बेपत्ता झाल्याची तक्रार नेरूळ पोलीस ठाण्यात दाखल केली. पोलिसांकडून सचिनचा शोध सुरू असताना, त्याचे शेवटचे मोबाइल लोकेशन एका मॉलजवळ आढळून आले. त्या मॉलमधील सीसीटीव्ही फूटेजची तपासणी केल्यानंतर पोलिसांच्या हाती लागलेल्या माहितीवरून गुन्हे शाखेने केलेल्या तपासात सचिन गर्जे याचे अपहरण करून नेणाऱ्या आरोपींचा पोलिसांनी शोध घेऊन त्यांची धरपकड केली.
या आरोपींची चौकशी केल्यानंतर उलवे भागातील सराईत गुन्हेगार विकी देशमुख याच्या सांगण्यावरून सचिन गर्जे याची हत्या केल्याची कबुली दिली. सचिनची हत्या करणारा सराईत गुन्हेगार विकी देशमुख व सचिन गर्जे हे दोघे पूर्वी एकाच कारागृहात शिक्षा भोगत होते. तेथे त्यांच्यात मैत्री होऊन दोघांनी एकत्रितरित्या अनेक गुन्हे केले आहेत. त्यामुळे विकी देशमुखने आपलाच सहकारी असलेल्या सचिनची हत्या का घडवून आणली, हे अद्याप स्पष्ट होऊ शकलेले नाही. विकी देशमुखच्या अटकेनंतर या हत्येमागचे कारण स्पष्ट होईल, असे पोलिसांनी सांगितले. सध्या पोलिसांनी या हत्या प्रकरणात सहभाग असलेल्या तिघांना अटक केली आहे. आरोपींनी दिलेल्या कबुली जबाबावरून पोलिसांनी मृतदेह जाळलेल्या ठिकाणी जाऊन सापडलेल्या पुरावे व अवशेषाचा पंचनामा केला. येथे जाळलेला मृतदेह सचिन गर्जे याचाच आहे का, हे तपासण्यासाठी तेथे आढळून पुरावे पुढील तपासणीसाठी फॉरेन्सिक लॅबला पाठविल्याची माहिती उपायुक्त प्रवीण पाटील यांनी दिली.
अशी लावली मृतदेहाची विल्हेवाट
आरोपींच्या चौकशीत त्यांनी सचिन गर्जे याला बेदम मारहाण करून गोळी घालून त्याची हत्या केल्याचे समोर आले. त्यानंतर त्यांनी त्याचा मृतदेह उरणच्या खाडीत टाकून दिला. समुद्राला भरती आल्यानंतर त्याचा मृतदेह परत किनाऱ्यावर आल्याने या मारेकऱ्यांनी सचिन गर्जे याचा मृतदेह खाडीतील गाळात पुरण्याचा प्रयत्न केला. त्यावेळेस पडलेल्या पावसामुळे गाळातूनदेखील त्याचा मृतदेह बाहेर आल्याने अखेर या मारेकऱ्यांनी मृतदेहाची चिरनेर येथील जंगलात जाळून विल्हेवाट लावली.
