सामना प्रतिनिधी । उरण
विजयासाठी सर्वस्वी शेकापवर विसंबून राहिलेल्या महागंठबंधनचे उमेदवार तथा अजीत पवार यांचे सुपुत्र आणि शरद पवारांचे नातू पार्थ पवार यांना पराभवाची धुळ चारीत मावळ लोकसभा मतदारसंघातून सेनेचे श्रीरंग बारणे दुसऱ्यांदा विजयी झाले आहेत. पार्थ पवारांचं पार्सल पराभूत करून बारामतीकडे रवाना केल्याचा आणि देशात पुन्हा एकदा मोदींच्या नेतृत्वाखाली बहुमताने सरकार सत्तेवर आल्याचा उरणमध्ये सेना-भाजप कार्यकर्त्यांनी फटाके वाजवून,फिर एक बार,मोदी सरकारच्या घोषणा देत शहरातून मिरवणूक काढून जोरदार जल्लोष केला.एकीकडे उरणमध्ये सेना-भाजप कार्यकर्त्ये फटाके वाजवून जल्लोष साजरा करीत असताना दुसरीकडे काँग्रेस,राष्ट्रवादी आणि मनसे आदी राजकीय पक्षाच्या कार्यालयात शुकशुकाट पसरला होता.
मावळची जागा पवार घराण्यामुळे प्रतिष्ठेची बनली होती.पार्थ पवार यांच्या विजयासाठी शरद पवारांसह अजित पवारांचे अख्खे कुटुंब आणि राज ठाकरे, धनंजय मुंडे यांनी मतदारसंघात प्रचाराचा धुरळा उडविला होता.तर दुसऱ्यांदा खासदारकीची लढविणाऱ्या सेनेच्या श्रीरंग बारणे यांच्या प्रचारासाठी सेनेचे कार्याध्यक्ष उध्दव ठाकरे,युवा अध्यक्ष ठाकरे, मुख्यमंत्री देवेंद्र फडणवीस,केद्रीय मंत्री नितीन गडकरी यांनी जोरदार प्रचार करीत नवख्या पार्थ पवारांचं पार्सल बारामतीकडे रवाना करण्याचे आवाहन केले होते.सेना-भाजपच्या आणि केंद्रात पुनश्च मोदी सरकार या आवाहनाला प्रतिसाद देत मावळ लोकसभा निवडणुकीत मतदारांनी अखेर पार्थ पवारांचं पार्सल बारामतीकडे रवाना केले आहे.
2014 साली झालेल्या लोकसभा निवडणूकीत शेकापने लक्ष्मण जगताप यांना उमेदवारी देऊन मनसेच्या साथीने निवडणूक लढवली होती.मात्र सेनेचे श्रीरंग बारणे यांनी जगताप यांना पराभूत केले होते. त्यामुळे मावळ लोकसभा मतदार संघातील महागठबंधनचे उमेदवार पार्थ पवार यांच्या विजयाची सर्वस्वी जबाबदारी शेकापवर सोपवली होती.मात्र शेकापवर सोपविण्यात आलेली जबाबदारी पार पाडता आलेली नाही. पार्थ पवारांचं पार्सल पराभूत करून बारामतीकडे रवाना केल्याचा आणि देशात पुन्हा एकदा मोदींच्या नेतृत्वाखाली बहुमताने सरकार सत्तेवर आल्याचा उरणमध्ये सेना-भाजप कार्यकर्त्यांनी फटाके वाजवून, फिर एक बार, मोदी सरकारच्या घोषणा देत शहरातून मिरवणूक काढून जोरदार जल्लोष केला.यामध्ये महेश बालदी, नरेश रहाळकर आणि सेना-भाजपचे शेकडो पदाधिकारी, कार्यकर्ते मोठ्या संख्येने सहभागी झाले होते.
