सिंगापूरने हिंदुस्थानातून आयात केलेला एव्हरेस्टचा फिश करी मसाला बाजारातून मागे घेण्याची घोषणा केली. यामुळे हिंदुस्थानातील एव्हरेस्ट मसाला वापरणाऱया ग्राहकांना मोठा धक्का बसला. मसाल्यामध्ये कीटकनाशक इथिलीन ऑक्साईडचे प्रमाण जास्त असल्याचे सांगत हा निर्णय घेण्यात आला. या कीटकनाशकाचा वापर सूक्ष्मजीवांचे प्रदूषण कमी करण्यासाठी व कृषी उत्पादनांवर फवारणी करण्यासाठी केला जातो. मात्र त्याचा खाद्यपदार्थांमध्ये वापर करण्यास बंदी आहे. ते मानवी आरोग्यासाठी योग्य नाही, असे सिंगापूर फूड एजन्सीने म्हटले आहे.
सिंगापूर फूड एजन्सी (एसएफए) ने आयातदार एसपी मुथिया ऍण्ड सन्स यांना परत मागवण्याची प्रक्रिया सुरू करण्याचे निर्देश दिले. हिंदुस्थानी कंपनी एव्हरेस्टची उत्पादने 80 हून अधिक देशांना पुरवली जातात. मसाल्यांच्या निर्जंतुकीकरणामध्ये इथिलीन ऑक्साईडचा वापर करण्यास परवानगी नाही. इथिलीन ऑक्साईडचा वापर कृषी उत्पादनांमध्ये सूक्ष्मजीव दूषित होण्यापासून रोखण्यासाठी केला जातो. सिंगापूरच्या अन्न नियमांनुसार मसाल्यांच्या निर्जंतुकीकरणामध्ये इथिलीन ऑक्साईड वापरण्याची परवानगी आहे.
ज्या ग्राहकांनी प्रभावित उत्पादने खरेदी केली आहेत, त्यांनी त्यांचा वापर करू नये, असा सल्ला सिंगापूर फूड एजन्सीने दिला आहे. याव्यतिरिक्त ज्या लोकांनी प्रभावित उत्पादनांचे सेवन केले आहे, त्यांनीही वैद्यकीय मार्गदर्शन घ्यावे, असे म्हटले आहे. फिश करी मसाल्यामध्ये मिरची, धणे, चिंच, जिरे आणि लसूण यांसारख्या गोष्टींचा वापर केला जातो. एव्हरेस्ट फिश करी मसाला विविध प्रकारचे ताजे पाणी आणि समुद्राच्या पाण्यातील माशांच्या पाककृती तयार करण्यासाठी वापरले जाऊ शकते.
कंपनी चौकशी करणार
विओनच्या अहवालानुसार, कंपनीने एक निवेदन दिले आहे की, एव्हरेस्ट हा 50 वर्षे जुना नामांकित ब्रँड आहे. आमची सर्व उत्पादने चाचणीनंतरच तयार केली जातात. आमच्या उत्पादनांची भारतीय मसाला मंडळाकडून चाचणी घेतली जाते. सध्या आम्ही अधिकृत माहितीची वाट पाहत आहोत. आमची टीम या प्रकरणाची सखोल चौकशी करेल, असे कंपनीने म्हटले आहे.
