उन्हाळा म्हटलं की सर्वांच्या आवडीचा रसरशीत आणि गोड आंबा आठवतो. लहानांपासून मोठ्यांपर्यंत प्रत्येकजण आंब्याचा मनसोक्त आस्वाद घेतो. आंब्यापासून रस, आमरस, शेक, आईस्क्रीम आणि विविध पदार्थ तयार केले जातात. मात्र, आंबे जास्त काळ ताजे ठेवण्यासाठी ते कसे साठवावेत, हा प्रश्न अनेकांना पडतो. काहीजण आंबे थेट फ्रिजमध्ये ठेवतात, तर काहीजण ते बाहेर ठेवणे योग्य मानतात. त्यामुळे आंबे साठवण्याची योग्य पद्धत जाणून घेणे महत्त्वाचे ठरते.
आंबे फ्रिजमध्ये ठेवणे योग्य आहे का?
जर आंबे कच्चे किंवा अर्धवट पिकलेले असतील, तर ते फ्रिजमध्ये ठेवू नयेत. अशा आंब्यांना खोलीच्या तापमानावर ठेवल्यास ते नैसर्गिकरीत्या पिकतात आणि त्यांचा गोडवा व चव टिकून राहते.
मात्र, आंबे पूर्णपणे पिकल्यानंतर ते फ्रिजमध्ये ठेवता येतात. फ्रिजमध्ये ठेवल्यास पिकलेले आंबे साधारण ४ ते ५ दिवस ताजे राहतात. तथापि, अतिथंड तापमानामुळे काहीवेळा आंब्याची नैसर्गिक चव आणि पोत बदलू शकते. त्यामुळे गरजेनुसारच आंबे फ्रिजमध्ये ठेवावेत.
आंबे साठवण्याच्या योग्य टिप्स
कागदी पिशवीचा वापर करा
कच्चे आंबे लवकर पिकवायचे असतील, तर ते कागदी पिशवीत किंवा वर्तमानपत्रात गुंडाळून ठेवा. यामुळे आंबे समान रीतीने आणि लवकर पिकण्यास मदत होते. प्लास्टिकच्या पिशवीत ठेवल्यास ओलावा वाढून आंबे खराब होण्याची शक्यता असते.
थंड आणि कोरड्या जागी ठेवा
आंबे नेहमी थेट सूर्यप्रकाशापासून दूर ठेवावेत. जास्त उष्णतेमुळे ते लवकर खराब होऊ शकतात. हवेशीर आणि कोरड्या जागेत ठेवलेले आंबे अधिक काळ टिकतात.
कापलेले आंबे हवाबंद डब्यात ठेवा
कापलेले आंबे उघड्यावर ठेवू नयेत. उरलेले तुकडे हवाबंद डब्यात भरून फ्रिजमध्ये ठेवावेत. यामुळे त्यांचा ताजेपणा आणि चव टिकून राहते.
जास्त काळासाठी फ्रीझरचा वापर करा
आंबे दीर्घकाळ साठवायचे असतील, तर त्यांचे छोटे तुकडे करून हवाबंद डबा किंवा झिपलॉक पिशवीत भरून फ्रीझरमध्ये ठेवावेत. अशा प्रकारे आंबे अनेक दिवस ताजे राहू शकतात.
