शिवसेना (उद्धव बाळासाहेब ठाकरे) पक्षाचे नेते, युवासेनाप्रमुख आणि आमदार आदित्य ठाकरे यांनी आज मुंबईतील वरळी येथील एनएससीआय डोममध्ये आयोजित पक्षाच्या ‘निर्धार मेळाव्यात’ ‘वोटचोरी म्हणजे,निवडणूक चोरी‘ संदर्भात सादरीकरण केले. या सादरीकरणदरम्यान त्यांनी वरळी मतदारसंघातील बोगस मतदार यादी मांडली. वरळी विधानसभा मतदारसंघात १९ हजार ३३३ मतदार हे बोगस असल्यासची माहिती त्यांनी दिली. निवडणूक आयोगावर हल्लाबोल करत आदित्य ठाकरे म्हणाले की, “वरळीत १९ हजार ३३३ मतदार गडबडीतले आहेत. निवडणूक आयोग भाजपसाठी काम करत आहे.”
यावेळी बोलताना आदित्य ठाकरे म्हणाले की, “आपण प्रत्येक जणांना सांगत असतो की, यादींचं वाचन झालं पाहिजे. आतापर्यंत किती शाखेत यादींचं वाचन झालं आहे, वरळीचं उदाहरण देत आहे. तुम्ही मतचोरी पकडली, तुम्ही चूक पकडली नाही, तर बोगस सरकार डोक्यावर बसेल. आता तुम्ही ठरवायचं आहे की, तुम्ही मतचोरी पकडायची आहे की नाही. वरळीत लोकसभेत २,५२, ९७० मते होती. त्यानंतर विधानसभेत ही मते २,६३,३५२ इतके मते झाली. आपण नैसर्गिक वाढ झाली, असे समजू शकतो. चार महिन्यात वाढ झाली असावी’.
ते म्हणाले, “वरळीत आतापर्यंत १६,०४३ मतांची वाढ झाली. तर ५,६६१ मते आहेत. मतदारयादीचा अभ्यास केला. वाढलेले मतदार पाहिले तर, त्यात १९,३३३ मतदारांमध्ये गडबड दिसून आली. फोटो भूरकट केले आहेत. यातील नरहरी कुलकर्णी नावाच्या व्यक्तीचा लोकसभेत मृत्यू झाला होता. विधानसभेत त्यांनी येऊन मतदान केलं. यामुळे याबाबत चौकशी देखील केली. मतदान केल्यानंतर या माणसाला यादीतून काढलं आहे. हे पहिलं उदाहरण आहे.”
शिवसैनिकांना संबोधित करताना आदित्य ठाकरे पुढे म्हणाले की, “निवडणुकीत तुमची जबाबदारी म्हणजे मतदारयादी आहे. आता १२०० लोकांची मतदारयादी असणार आहे. या यादीचा अभ्यास करायला लागणार आहे. आतापर्यंत अनेक तंत्रज्ञान वापरून सर्व पकडू शकलो नाही. निवडणूक आयोगाकडे एक सॉफ्टवेअर आहे. ते सॉफ्टवेअर फोटोच्या चुका पकडतं. ते किती याद्यांमध्ये आहे, हे आपल्याला यादी वाचूनच कळतं. तुम्ही पोलिंग एजंट बसला. त्यावेळी तुम्ही काय पाहाल. एका फोटोमध्ये फक्त नाक दाखवलं आहे. तुम्हाला फोटो ओळखता आला पाहिजे. वरळीतील गडबड असणाऱ्या मतदारांची संख्या २२ ते २३ हजार असू शकते. हा कमीत कमी आकडा वाटतोय. अजून यादीचं वाचन सुरु आहे. फोटो नसेल तर मतदाराला कसं ओळखणार, याकडेही तुमचं लक्ष असलं पाहिजे.”
