कोरियन स्किनकेअरची चर्चा झाली की तांदळाच्या पाण्याचा उल्लेख हमखास होतो. पूर्वी तांदळाचे पाणी चेहऱ्यावर लावण्याचा ट्रेंड होता, पण आता अनेक जण ते पिण्यालाही प्राधान्य देत आहेत. तांदळाचे पाणी प्यायल्याने त्वचेला आतून चमक येते, त्वचा निरोगी राहते आणि हायड्रेशन सुधारते, असे अनेक दावे केले जातात. मात्र, या दाव्यांमध्ये किती तथ्य आहे, हे जाणून घेणे महत्त्वाचे आहे.
त्वचारोग तज्ज्ञांच्या मते, तांदळामध्ये काही अमिनो ॲसिड, जीवनसत्त्वे आणि अँटीऑक्सिडंट घटक असतात. हे घटक त्वचेला दाहापासून काही प्रमाणात संरक्षण देण्यास आणि त्वचेचे आरोग्य टिकवून ठेवण्यास मदत करू शकतात. त्यामुळे तांदळाचे पाणी त्वचेसाठी उपयुक्त ठरू शकते.
त्वचेसाठी तांदळाचे पाणी कसे फायदेशीर ठरू शकते?
तांदळाचे पाणी त्वचेवर नैसर्गिक संरक्षक थर तयार करण्यास मदत करू शकते. काही लोकांमध्ये त्वचेचा पोत सुधारण्यास आणि त्वचा अधिक नितळ दिसण्यासही मदत होऊ शकते. मात्र, तांदळाची ॲलर्जी असल्यास त्याचा वापर टाळावा.
तांदळाचे पाणी कसे तयार करावे?
तांदूळ स्वच्छ धुवून काही वेळ पाण्यात भिजवा किंवा भरपूर पाण्यात उकळा. त्यानंतर मिळणारे पाणी गाळून एक-दोन तास आंबवून फ्रिजमध्ये ठेवू शकता. हे पाणी २४ तास ते जास्तीत जास्त २–३ दिवसांच्या आत वापरणे योग्य मानले जाते.
तांदळाचे पाणी प्यायल्याने त्वचा उजळते का?
तज्ज्ञांच्या मते, तांदळाच्या पाण्यामुळे शरीराला हायड्रेशन मिळू शकते आणि त्यातील कर्बोदके शरीराला ऊर्जा देतात. शरीरात योग्य प्रमाणात पाणी आणि ऊर्जा असल्यास त्वचेच्या पेशींचे कार्य सुरळीत राहण्यास मदत होते. मात्र, तांदळाचे पाणी प्यायल्यानेच त्वचा उजळते, वृद्धत्वाची प्रक्रिया मंदावते किंवा सूर्यप्रकाशापासून संरक्षण मिळते, असे सिद्ध करणारा ठोस वैज्ञानिक पुरावा अद्याप उपलब्ध नाही.
दररोज तांदळाचे पाणी पिणे योग्य आहे का?
मर्यादित प्रमाणात तांदळाचे पाणी पिणे बहुतेक निरोगी व्यक्तींसाठी सुरक्षित असू शकते. मात्र, केवळ तांदळाच्या पाण्यावर त्वचेचे आरोग्य अवलंबून नसते. संतुलित आहार, पुरेसे पाणी, नियमित झोप आणि सनस्क्रीनचा वापर हेही तितकेच महत्त्वाचे आहेत.
