वाढत्या जागतिक संकटामुळे आणि अमेरिका इराण यांच्यातील वाढत्या संकाामुळे शेअर बाजारात मंगळवारी मोठी घसरण झाली. निफ्टी सुमारे १६० अंकांनी, तर सेन्सेक्स सुमारे ६०० अंकांनी घसरून बंद झाला. या घसरणीमुळे गुंतवणूकदारांचे ३ लाख कोटी रुपयांचे नुकसान झाले.
कच्च्या तेलाच्या किमतीत मोठी वाढ झाल्याने आणि पश्चिम आशियामध्ये पुन्हा तणाव वाढल्याने भारतीय शेअर बाजारात मोठी घसरण झाली आहे. परदेशी गुंतवणूकदारांनी अलीकडेच पैसे काढल्याने आणि जागतिक बाजारातील घसरणीमुळे गुंतवणूकदारांचे मोठे नुकसान झाले आहे.
मंगळवारच्या व्यवहारादरम्यान, सेन्सेक्स ५६१.४६ अंकांनी, म्हणजेच ०.७२ टक्क्यांनी घसरून ७७,०५४.९४ अंकांवर बंद झाला. निफ्टी १५८.९५ अंकांनी, म्हणजेच ०.६६ टक्क्यांनी घसरून २४,०५२.०५ अंकांवर बंद झाला. बँक निफ्टी ६७० अंकांनी घसरला. बीएसईच्या महत्त्वाच्या ३० शेअर्सपैकी केवळ सहा शेअर्स वाढीसह बंद झाले, तर उर्वरित २४ शेअर्समध्ये घसरण झाली. एचसीएल टेक ४ टक्क्यांहून अधिक घसरला, तर बजाज फिनसर्व्ह २.५ टक्क्यांनी घसरला. याव्यतिरिक्त, इंडिगो, एसबीआय, महिंद्रा अँड महिंद्रा आणि एल अँड टी यांचे शेअर्सदेखील २ टक्क्यांहून अधिक घसरले. बाजारातील घसरणीमुळे बीएसईच्या बाजार भांडवलातही लक्षणीय घट झाली. बीएसईचे बाजार भांडवल ३ लाख कोटी रुपयांनी घसरून ४८२.४१ लाख कोटी रुपयांवरून ४७९.४० लाख कोटी रुपयांवर आले.
अमेरिकेच्या लष्कराने सोमवारी सलग तिसऱ्या रात्री इराणवर हल्ले केले, त्याचवेळी राष्ट्राध्यक्ष डोनाल्ड ट्रम्प यांनी इराणच्या सागरी वाहतुकीवर पुन्हा नाकेबंदी लादली आणि होर्मुझच्या सामुद्रधुनीसाठी २० टक्के शुल्काचा प्रस्ताव दिला. यामुळे तणाव आणखी वाढला आहे. ब्रेंट क्रूडच्या किमती १.६३ टक्क्यांनी वाढून प्रति बॅरल ८४.६० अमेरिकी डॉलरवर पोहोचल्या. १७ जून रोजी अमेरिका आणि इराणने युद्ध संपवण्यासाठी सामंजस्य करारावर स्वाक्षरी केल्यापासूनची ही सर्वोच्च पातळी आहे. तेलाच्या किमतीतील ही वाढ चिंतेचे कारण ठरत आहे.
आशियाई बाजारांमध्ये घसरण दिसून आली, दक्षिण कोरियाचा कोस्पी ३.७१ टक्क्यांनी घसरला. जपानचा निक्केई २२५, शांघायचा एस.एस.ई. कंपोझिट आणि हाँगकाँगचा हँग सेंग हे निर्देशांकही घसरले होते. अमेरिकेच्या बाजारातही घसरणीची चिन्हे दिसू लागली. विदेशी संस्थागत गुंतवणूकदारांनी (FIIs) सोमवारी ३,०६२.२७ कोटी रुपयांच्या शेअर्सची विक्री केली. विदेशी गुंतवणूकदारांकडून सातत्याने होणाऱ्या विक्रीमुळे देशांतर्गत इक्विटीवर दबाव येत आहे. त्यामुळे शेअर बाजार सध्या दबावात आहे. बाजारातील अस्थिरतेचा निर्देशक असलेला इंडिया VIX जवळपास ३ टक्क्यांनी वाढून १४ च्या पातळीवर पोहोचला.
भू-राजकीय तणावामुळे रुपयासह बहुतेक आशियाई चलनांवर दबाव आला, जो अमेरिकन डॉलरच्या तुलनेत ४८ पैशांनी घसरून ९६.१६ वर आला. आंतरबँक विदेशी चलन बाजारात रुपया ९५.९५ वर उघडला आणि नंतर मागील बंद भावापेक्षा ४८ पैशांनी घसरून ९६.१६ वर आला.
