दिल्लीतील कथित मद्य घोटाळ्यात अंमलबजावणी संचालनालयाने (ईडी) 6 समन्स पाठवूनही आम आदमी पार्टीचे राष्ट्रीय समन्वयक आणि मुख्यमंत्री अरविंद केजरीवाल (Delhi Chief Minister Arvind Kejriwal) हे चौकशीला गैरहजर राहिले आहेत. ईडीने केजरीवाल यांना 17 फेब्रुवारी रोजी सहावे समन्स पाठवून सोमवारी 19 फेब्रुवारी रोजी चौकशीला हजर राहण्यास सांगितले होते. मात्र केजरीवाल चौकशीला गैरहजर राहिले असून आम आदमी पार्टीने याबाबत स्पष्टीकरणही दिले आहे.
ईडीने अरविंद केजरीवाल यांना पाठवलेले समन्स बेकायदेशीर असल्याचे आम आदमी पार्टीने म्हटले आहे. या समन्सच्या वैधतेबाबत न्यायालयात सुनावणी सुरू आहे. त्यामुळे ईडीने वारंवार समन्स पाठवण्याऐवजी न्यायालयाच्या निर्णयाची वाट पाहावी, असा सल्लाही आपने दिला आहे.
Delhi CM Kejriwal skips sixth ED summon; ‘illegal’ order says AAP
Edited video is available on PTI Videos (https://t.co/L2D7HH3xZ2) #PTINewsAlerts #PTIVideos @PTI_News pic.twitter.com/cXnj94cY8s
— PTI News Alerts (@PTI_NewsAlerts) February 19, 2024
ईडीने अरविंद केजरीवाल यांना याआधी 2 नोव्हेंबर, 21 डिसेंबर, 3 जानेवारी, 17 जानेवारी, 2 फेब्रुवारीला समन्स पाठवले होते. पाच समन्स बजावूनही केजरीवाल चौकशीला हजर न राहिल्याने ईडीने राऊस अॅव्हेन्यू कोर्टात याचिका दाखल केली होती. या याचिकेवर 14 फेब्रुवारी रोजी सुनावणी पार पडली.
सुनावणीवेळी न्यायालयाने केजरीवाल यांना 17 फेब्रुवारी रोजी न्यायालयात उपस्थित राहून ईडीच्या चौकशीला गैरहजर राहण्याचे कारण स्पष्टी करण्यास सांगितले होते. मात्र केजरीवाल प्रत्यक्ष न्यायालयात उपस्थित राहिले नाहीत. ते व्हिडीओ कॉन्फरन्सद्वारे न्यायालयात उपस्थित राहिले.
विधानसभेत आणि अर्थसंकल्पीय अधिवेशनातील विश्वासदर्शक ठरावावरील चर्चेमुळे आपण न्यायालयात प्रत्यक्ष हजर राहू शकत नसल्याचे त्यांनी सांगितले. मात्र पुढील सुनावणीला (16 मार्च) आपण न्यायालयात प्रत्यक्ष हजर राहू असे ते म्हणाले. त्यानंतरही ईडीने केजरीवाल यांना समन्स बजावून सोमवारी चौकशीला बोलावले होते.
