खरंतर पूर्वी बैलांच्या जोडीनं शेती उभी केली जात होती. सर्जा -राजा बळीराजाचे जीव की प्राण ठरले होते. यंत्र यंत्रयुग आले अन शेतीत फार मोठे बदल झालेत. यंत्राचा माध्यमातून शेती फुलू अन बहरू लागली. सर्जा-राजाची जागा यंत्राने घेतली. आणि या यंत्राचे नाव ठेवल्या गेलं ‘इलेक्ट्रिकल बैल’. हा ‘इलेक्ट्रिकल बैल’ शेतकऱ्यांना फार उपयोगी ठरला आहे. चंद्रपुरात सुरु असलेल्या कृषी महोत्सवात हा बैल आला आहे. या इलेक्ट्रिकल बैलाने बळीराजाचे लक्ष वेधले आहे.
पूर्वजांनी बैलांच्या मदतीने शेती उभी केली. बैलांच्या मदतीने पेरणी, नांगरणी केली जायची. आता हेच काम यंत्र करणार आहे. एका कृषी प्रदर्शनात हे यंत्र ठेवले असता काही शेतकऱ्यांना याचे काम बघून हा तर ‘इलेक्ट्रिकल बैल’ असल्याचे संबोधले. यानंतर याला ‘इलेक्ट्रिकल बैल’ नावानेच प्रसिद्धी मिळाली आहे. हे एक इलेक्ट्रिक व्हेईकल आहे. याला चार्जिंग करण्यासाठीची सुविधा आहे. एकेरी बॅटरी चार्ज करण्यास अडीच तास लागतात तर दुहेरी बॅटरी चार्ज करण्यात चार तास लागतात. एकदा चार्ज केल्यास हे यंत्र सात तास शेतात चालू शकतं. याचा खर्च हा एक दिवसाचा केवळ 50 ते 60 रुपये आहे. या यंत्राच्या समोर फवारणी करण्यासाठी दोन पाईप दिले आहेत. त्याला जोडून रॉड देखील आहेत. त्याला जोडल्यास तब्बल 12 फुटापर्यंत फवारणी करता येऊ शकते.
शेतात काम करत असताना शेतकऱ्याचा विरंगुळा व्हावा याची देखील सोय या ठिकाणी करण्यात आली आहे. ब्लूटूथ आणि एफएम रेडीओची देखील सुविधा यात करण्यात आली आहे. या यंत्रात कॅमेरा देखील लावण्यात आला आहे. त्यामुळे रस्त्यात पूढे काय आहे हे शेतकऱ्याला सहज दिसू शकते. तसेच या यंत्रात जीपीएस देखील लावण्यात आला आहे. त्यामुळे त्याला कुठल्याही आधुनिक यंत्राला जोडले जाऊ शकते. सध्या याची किंमत ही साडे तीन लाख अशी आहे. मात्र हे यंत्र घेण्यासाठी महाराष्ट्र शासनाकडून 50 टक्के अनुदान शेतकऱ्याला दिले जाते.
