पाणी टँकर चालकांच्या संपाचा परिणाम अवघ्या एका दिवसातच छत्रपती शिवाजी महाराज टर्मिनस (सीएसएमटी) स्थानकावर दिसू लागला असून मध्य रेल्वेला आपत्कालीन उपाययोजना राबवाव्या लागल्या आहेत. पाणीटंचाईमुळे लांब पल्ल्याच्या गाड्यांच्या वेळापत्रकावर परिणाम होण्याची शक्यता निर्माण झाली आहे. टाईम्स ऑफ इंडियाने याबाबत वृत्त दिले आहे.
सीएसएमटी स्थानकाला दररोज सुमारे 13 लाख लिटर पाण्याची आवश्यकता असते. यापैकी 6 लाख लिटर पाणी बृहन्मुंबई महानगरपालिकेकडून पुरवले जाते, तर उर्वरित पाणी 144 टँकरद्वारे उपलब्ध केले जाते. हे पाणी 26 लांब पल्ल्याच्या गाड्यांना, स्थानक परिसर, सार्वजनिक स्वच्छतागृहे, उपाहारगृहे, कर्मचारी सुविधा, फलाटांची स्वच्छता तसेच वाडीबंदर येथील डेपोमध्ये डब्यांच्या धुलाईसाठी वापरले जाते.
मात्र सोमवारी दुपारपर्यंत अपेक्षित 70 टँकरांपैकी केवळ 50 टँकरच सीएसएमटी येथे पोहोचले. त्यामुळे जवळपास 4.5 लाख लिटर पाण्याची कमतरता निर्माण झाली.
या परिस्थितीचा सामना करण्यासाठी मध्य रेल्वेने इगतपुरी, पनवेल आणि भुसावळ स्थानकांवर अतिरिक्त पाणीपुरवठ्याची व्यवस्था केली आहे. आवश्यकतेनुसार गाड्यांना या स्थानकांवर अधिक वेळ थांबवून पाणी भरावे लागू शकते. त्यामुळे काही गाड्यांच्या वेळापत्रकावर परिणाम होण्याची शक्यता अधिकाऱ्यांनी व्यक्त केली आहे.
मध्य रेल्वेचे मुख्य जनसंपर्क अधिकारी स्वप्नील नीला यांनी सांगितले की, “टँकर संपामुळे आमच्या पर्यायी पाणीपुरवठा व्यवस्थेवर परिणाम झाला आहे. सध्या आपत्कालीन उपाययोजनांच्या माध्यमातून परिस्थिती हाताळली जात आहे. महापालिकेकडून मिळणारा 6 लाख लिटर पाणीपुरवठा नियमित सुरू असून आवश्यकतेनुसार अतिरिक्त पाण्याची मागणी करण्यात आली आहे. प्रवाशांना कमीत कमी त्रास होईल यासाठी सर्वतोपरी प्रयत्न केले जात आहेत.”
दरम्यान, दादर स्थानकावर अद्याप मोठा परिणाम झालेला नसला तरी हे स्थानकही टँकरच्या पाण्यावर मोठ्या प्रमाणात अवलंबून आहे. दादर स्थानकाला दररोज सुमारे 4.8 लाख लिटर पाणी 48 टँकरद्वारे पुरवले जाते. दादर मिडटाउन परिसराचाही त्यात समावेश आहे. या स्थानकाला महापालिकेकडून थेट पाणीपुरवठा होत नसल्याने संप दीर्घकाळ सुरू राहिल्यास परिस्थिती गंभीर होऊ शकते. लोकमान्य टिळक टर्मिनसवर (एलटीटी) सध्या किरकोळ परिणाम झाल्याचे रेल्वे प्रशासनाने सांगितले आहे.
टँकर संप लवकर मिटला नाही तर स्थानकांवरील स्वच्छतागृहे, पिण्याच्या पाण्याच्या सुविधा आणि अन्य प्रवासी सेवांवर ताण येण्याची शक्यता रेल्वे अधिकाऱ्यांनी व्यक्त केली आहे.
