जगभरातील क्रिकेटप्रेमींसाठी खुशखबर आहे. तब्बल 128 वर्षांनी ऑलिम्पिकमध्ये क्रिकेटचा समावेश झाला आहे. 2028मध्ये अमेरिकेतील लॉस एंजलिसमध्ये होणाऱ्या ऑलिम्पिक क्रीडा स्पर्धेमध्ये क्रिकेटचा समावेश करण्याच्या शिफारसीवर आंतरराष्ट्रीय ऑलिम्पिक समितीने मोहर उमटवली आहे. त्यामुळे आता ऑलिम्पिकमध्ये चौकार-षटकारांची आतषबाजी आणि विकेटचा जल्लोष पहायाला मिळणार आहे.
On including Cricket in the 2028 Olympics, We are still in the proposal mode. The number of teams participating is still not clear yet: IOC President Thomas Bach pic.twitter.com/v09H6lxgyR
— ANI (@ANI) October 13, 2023
क्रिकेटचा ऑलिम्पिकमध्ये समावेश होण्याची ही काही पहिलीच वेळ नाही. याआधी 1900मध्ये झालेल्या पॅरिस ऑलिम्पिकमध्ये क्रिकेटचा समावेश करण्यात आला. फ्रान्समध्ये झालेल्या ऑलिम्पिक स्पर्धेत यजमान फ्रान्स, ब्रिटन, नेदरलँड आणि बेल्झियमच्या संघाने क्रिकेट संघ पाठवण्याचा निर्णय घेतला. मात्र नेदरलँड आणि बेल्झियमच्या संघाने माघार घेतल्याने फ्रान्स आणि ब्रिटन संघात थेट सुवर्णपदकाचा सामना झाला.
सुवर्णपदकासाठीचा सामना दोन दिवस चालला. यात 12 सदस्यीय संघांना प्रत्येकी दोन डाव खेळण्याची संधी मिळाली. ब्रिटनने प्रथम फलंदाजी करताना 157 धावा केल्या आणि फ्रान्सच्या संघाला 78 धावांमध्ये गारद केले. त्यानंतर ब्रिटनने आपला दुसरा डाव 145 धावांवर घोषित केला आणि फ्रान्सपुढे विजयासाठी 185 धावांचे आव्हान ठेवले. या आव्हानाचा पाठलाग करताना फ्रान्सचा संघ अवघ्या 26 धावांवर बाद झाला आणि ब्रिटनने 158 धावांनी विजय मिळवला. त्यानंतर 1904 च्या सेंट लुईस ऑलिम्पिकमध्येही सुरुवातीला क्रिकेटचा समावेश होता. परंतु अखेर क्रिकेटला वगळण्यात आले. त्यानंतर ऑलिम्पिकमध्ये क्रिकेट खेळवण्यात आले नाही.
