कधीही ‘शांत’ न बसणारा देश अशी ओळख असलेल्या इस्रायलने जगाला नवा धक्का दिला आहे. इस्रायलने हिंदुस्थानात गुपचूप ऑपरेशन सुरू केले आहे. हिंदुस्थानातील सहा हजार ज्यू लोकांना इस्रायलमध्ये पळवून नेले जात आहे. यासंदर्भात इस्रायली संसदेत ठराव करण्यात आल्याची माहिती समोर आली आहे.
हिंदुस्थानच्या ईशान्य भागात ज्यू धर्मातील बनेई मेनाशे पंथाचे 5,800 लोक आहेत. या सर्व लोकांना टप्प्याटप्य्याने इस्रायलमध्ये वसवण्यात येणार आहे. पुढच्या पाच वर्षांत ही मोहीम पूर्ण केली जाणार आहे. पहिल्या टप्प्यात 2026 मध्ये 1200 लोकांना वसवण्यासाठी इस्रायली संसदेची मंजुरी मिळाली आहे. या संपूर्ण मोहिमेचा खर्च 240 कोटी असून इस्रायल सरकार हा खर्च करणार आहे.
काय आहे रणनीती?
इस्रायल हा अरब राष्ट्रांनी वेढलेला देश असून सतत युद्धात गुंतलेला असतो. जास्तीत जास्त भूमी इस्रायलच्या नकाशाला जोडण्याचे तेथील सरकारचे प्रयत्न लपून राहिलेले नाहीत. अमेरिकेचाही त्यास उघड पाठिंबा आहे. हिंदुस्थानातील बनेई मेनाशे समुदायाच्या लोकांना इस्रायलच्या सीमा भागात वसवण्यामागे हीच विस्तारवादी रणनीती आहे. इस्रायलच्या संपूर्ण सीमेवर ज्यू धर्मीयांचे वर्चस्व असल्यास संकटकाळात लष्कराला त्यांची मदत होईल, असे आडाखेही यामागे आहेत.
ज्यू धर्मगुरूंची टीम येणार
बनेई मेनाशे समुदायाचे अनेक लोक आधीपासूनच इस्रायलमध्ये आहेत. मात्र ते ज्यू आहेत की नाही यावर अनेक वर्षे मतभेद होते. 2005 साली ज्यू धर्मगुरू श्लोमो यांनी त्यांना इस्रायली वंशाचे म्हणून मान्यता दिली. त्यांना भेटण्यासाठी ज्यू धर्मगुरूंचा मोठा जथा लवकरच हिंदुस्थानात येणार आहे. ईशान्येकडील भागांत राहणाऱया नागरिकांना हे धर्मगुरू भेटणार असून त्यांच्याशी स्थलांतराबाबत सल्लामसलत करणार आहेत.
