सामना ऑनलाईन । लंडन
पंजाब नॅशनल बँकेला 13 हजार कोटींचा चुना लावून लंडनला पळून गेलेला हिऱ्यांचा व्यापारी नीरव मोदी याला अटक करण्यात आली आहे. नीरव मोदी याच्यावर लंडनमधील वेस्टमिंस्टर कोर्टाने पकडवॉरंट जारी केले होते. त्यामुळे त्याला आता कोणत्याही क्षणी अटक करण्यात येणार हे स्पष्ट झाले होते.
Enforcement Directorate: Fugitive diamond merchant Nirav Modi arrested in London, to be produced in court later today. pic.twitter.com/YrN7HdzLzI
— ANI (@ANI) March 20, 2019
नीरव मोदी आणि मेहुल चोक्सी या दोघांनी 13 हजार 700 कोटींना पंजाब नॅशनल बँकेला बुडवले आहे. त्या दोघांनीही परदेशात पलायन केले असून पीएनबी घोटाळ्याची चौकशी सीबीआय आणि ‘ईडी’ म्हणजे अंमलबजावणी संचालनालय करत आहे.
नीरव मोदी याच्याबाबत जारी करण्यात आलेल्या ‘रेड कॉर्नर’ नोटिसीवर कारवाई करून त्याला त्वरित अटक करावी अशी मागणी सीबीआयने इंटरपोल आणि ब्रिटनच्या सरकारकडे केली होती. तसेच मोदी याचे प्रत्यार्पण करण्यात यावे अशी मागणी ब्रिटनकडे करण्यात आली आहे. नीरव मोदी हा लंडनमध्ये ऐषोआरामात जगत असून त्याने तिथे हिऱ्यांचा व्यवसायही सुरू केल्याचा व्हिडीओच ‘टेलिग्राफ’ या इंग्रजी दैनिकाने प्रसृत केला होता. मोदी हा लंडनमध्ये 72 कोटींच्या फ्लॅटमध्ये राहत असून त्यासाठी महिन्याला 15 लाखांवर भाडे देत आहे, असे वृत्तही प्रसिद्ध झाले होते. त्यानंतर मोदी याच्या प्रत्यार्पणासाठी हिंदुस्थानने केलेल्या विनंतीनुसार ब्रिटनच्या गृह सचिवांनी न्यायालयात कायदेशीर कार्यवाही सुरू करण्याचे आदेश दिले असे अंमलबजावणी संचालनालयाने म्हटले होते. त्यानंतर आता नीरव मोदीला अटक झाल्याने हिंदुस्थानला मोठं यश मिळाले आहे.
