जगभरात हिंदुस्थानचा डंका वाजत असल्याचा टेंभा मिरवणाऱ्या तथाकथित विश्वगुरू नरेंद्र मोदी यांच्या काळात हिंदुस्थानचा भूक निर्देशांक आणखी 4 स्थानांनी घसरलाआहे. 125 देशांमध्ये हिंदुस्थान 111व्या स्थानावर आला आहे. भूक आणि उपासमारीला सामोरे जाणाऱ्या लोकांच्या संख्येनुसार हिंदुस्थान आता पाकिस्तान, श्रीलंका आणि बांगलादेशच्याही खाली घसरला आहे. यावरून विरोधकांनी मोदी सरकारला घेरले असतानाच अभिनेते प्रकाश राज यांनीही जोरदार टीका केली आहे.
दाक्षिणात्य अभिनेते प्रकाश राज यांनी पुन्हा एकदा पंतप्रधान नरेंद्र मोदी यांच्यावर निशाणा साधला आहे. जागतिक भूक निर्देशांकामध्ये हिंदुस्थानची घसरण झाल्यानंतर प्रकाश राज यांनी एक ट्विट केले आहे. या ट्विटमध्ये त्यांनी पंतप्रधान नरेंद्र मोदी यांचा जेवण करतानाचा फोटो शेअर केला आहे. या फोटोला त्यांनी ‘राजा सत्तेसाठी भुकेला असतो तेव्हा…’, असे कॅप्शन दिले आहे. तसेच सिटिझन हंगर इंडेक्स असेही यात लिहिले आहे.
Citizens hunger index…
When a KING is HUNGRY for POWER…. #justasking pic.twitter.com/NyejMuJjGz— Prakash Raj (@prakashraaj) October 13, 2023
‘ग्लोबल हंगर इंडेक्स’चा अहवाल गुरुवारी प्रसिद्ध करण्यात आला. जगभरातील 125 देशांच्या यादीत हिंदुस्थानचा 111 व्या स्थानावर आहे. या यादीत पाकिस्तान 102, बांगलादेश 81, नेपाळ 69 आणि श्रीलंका 60व्या स्थानावर आहे. 2014 च्या क्रमवारीत हिंदुस्थान 55 व्या स्थानावर होता. मात्र मोदी सरकार आल्यापासून ग्लोबल हंगर इंडेक्समध्ये हिंदुस्थानची तब्बल 56 स्थानांनी घसरण झाली आहे.
