‘मुख्यमंत्री लाडकी बहीण’ योजनेत कोल्हापूर जिल्हा राज्यात आघाडीवर असल्याचे दावे केले जात असतानाच, आज ‘लाडकी बहीण’ योजनेअंतर्गत मुख्यमंत्री एकनाथ शिंदे यांचे भाषण सुरू असताना, कोल्हापुरात रिकाम्या खुर्च्या पाहायला मिळाल्या. मुख्यमंत्र्यांचे भाषण सुरू असतानाच, जमलेल्या महिलांनी काढता पाय घेतला. त्यामुळे मोठ्या स्क्रीनवर मुख्यमंत्री भाषण ठोकत असताना समोर ऐकायला कोणीच नसल्याचे चित्र दिसून आले.
‘मुख्यमंत्री लाडकी बहीण योजने’चा पुण्यात शुभारंभ झाला. कोल्हापुरात मार्केट यार्ड परिसरातील सभागृहात मोठ्या स्क्रीनवर हा कार्यक्रम दाखविण्याचे आयोजन केले होते. यासाठी जिह्यातून महिलांना गोळा करण्यात आले होते. मात्र, सकाळी 9 वाजता होणारा हा कार्यक्रम दुपारी दीडनंतर सुरू झाला. यावेळी मुख्यमंत्री शिंदे यांचे भाषण सुरू सुरू असताना, महिलांनी सभागृहातून काढता पाय घेतला. त्यामुळे बहुतांशी मोकळ्या खुर्च्यांसमोर स्क्रीनवर मुख्यमंत्री भाषण करत असल्याचे चित्र दिसत होते.
