आपत्तीजन्य परिस्थितीत अडकलेल्या महिलांच्या बचावासाठी आता सोलापूर जिह्यात महिला रेस्क्यू टीम सज्ज झाली आहे. जिल्हा आपत्ती व्यवस्थापन विभागाच्या पुढाकाराने तयार करण्यात आलेली ही टीम महाराष्ट्रातील दुसरी महिला रेस्क्यू टीम ठरली असून, महिलांच्या सहभागामुळे बचावकार्य अधिक प्रभावी आणि समावेशक होणार आहे. पहिली महिला रेस्क्यू टीम कोल्हापूरमध्ये करण्यात आली आहे.
पंढरपूरच्या एकादशीच्या काळात वारकरी महिलांचे नदीत वाहून जाण्याचे प्रकार वारंवार घडतात. अशावेळी बचावकार्यात पुरुषांना मर्यादा येतात. ही गरज ओळखून जिल्हा प्रशासनाने महिलांची स्वतंत्र रेस्क्यू टीम तयार करण्याचा निर्णय घेतला. निवासी उपजिल्हाधिकारी अभिजीत पाटील यांनी याबाबत माहिती दिली.
महिला रेस्क्यू टीमला इंडियन रेस्क्यू ऍकॅडमीच्या प्रशिक्षकांकडून सखोल प्रशिक्षण दिले जात आहे. यामध्ये आपत्तीची ओळख, सीपीआर, स्ट्रेचर तयार करणे, प्राथमिक उपचार, बोट हाताळणी, दोरीचा वापर, गर्दी नियंत्रण, प्रशासनाशी समन्वय, अशा अनेक बाबींचा समावेश आहे. या महिलांना विजापूर रोडवरील महाराष्ट्र एज्युकेशन हॉटेल मॅनेजमेंट महाविद्यालयात प्रशिक्षण, तर हिप्परगा तलाव येथे प्रात्यक्षिके घेतली जात आहेत.
युवतींचा उत्स्फूर्त सहभाग
रेखा राठोड, उर्मिला पवार, अरुणा राठोड, रूपाली दोरकर, दुर्गा बनसोडे, जयश्री भिसे, शुभांगी गवते, नागोबाई बिराजदार, चैताली सावंत, लावण्या गुंडला, सोनिया चौगुले, राजश्री दोरनहळ्ळी, आस्मा शेख, पूजा जगताप, सुवर्णा गायकवाड या महिलांनी प्रशिक्षणात सहभाग नोंदवला आहे. प्रशिक्षण पूर्ण करणाऱया ‘आपदा सखीना’ जिल्हा आपत्ती व्यवस्थापन विभागाकडून प्रमाणपत्र आणि सुरक्षा कीट देण्यात येणार आहे.
बचावकार्यात प्रशिक्षित व्यक्तींची गरज असते. महिलांचा बचाव करताना महिलाच पुढे आल्या तर कार्य अधिक प्रभावी होते. सोलापूर जिल्हा आपत्ती व्यवस्थापन विभागाने ही गरज ओळखून महिला रेस्क्यू टीम तयार केली आहे, ही जिह्यासाठी अभिमानाची बाब आहे.
– शक्तिसागर ढोले, जिल्हा आपत्ती व्यवस्थापन अधिकारी, सोलापूर.
