अयोध्या येथील राम मंदिरातील देणगी घोटाळ्याविरोधात देशभरात वातावरण तापले आहे. मंदिराचे माजी सरचिटणीस चंपत राय यांना तात्काळ अटक करावी तसेच श्री राम जन्मभूमी तीर्थ क्षेत्र ट्रस्ट बरखास्त करण्याची आणि या प्रकरणाची सर्वोच्च न्यायालयाच्या देखरेखीखाली चौकशी करण्याची मागणी काँग्रेसने केली आहे. पंतप्रधान नरेंद्र मोदी यांनी देशाची माफी मागावी, अशीही मागणी काँग्रेसने केली आहे.
काँग्रेसचे सरचिटणीस जयराम रमेश यांनी ‘एक्स’ या सोशल मीडिया प्लॅटफॉर्मवर म्हटले आहे की, पंतप्रधान मोदी राम मंदिराचे श्रेय घेण्यात आघाडीवर होते, परंतु आता देणगी घोटाळ्याची जबाबदारी टाळत आहेत. काँग्रेसची मागणी आहे की ट्रस्ट बरखास्त करावा, खऱ्या गुन्हेगारांना अटक करावी, सर्वोच्च न्यायालयाच्या देखरेखीखाली चौकशी करावी, नवीन ट्रस्ट स्थापन करावा आणि पंतप्रधानांनी राष्ट्राची माफी मागावी, असे त्यांनी म्हटले आहे.
दिल्लीत एका पत्रकार परिषदेत, काँग्रेसचे ज्येष्ठ नेते आणि माजी खासदार शक्तीसिंह गोहिल यांनीही सर्वोच्च न्यायालयाच्या देखरेखीखाली चौकशीच्या आपल्या मागणीचा पुनरुच्चार केला. ते म्हणाले की, सध्याचा ट्रस्ट बरखास्त करून एक नवीन ट्रस्ट स्थापन करावा, ज्यामध्ये शंकराचार्य, सर्वोच्च न्यायालयाचे निवृत्त न्यायाधीश, निर्मोही आखाड्याचे प्रतिनिधी आणि संतांचा समावेश असावा.
कथित देणगीचा वाद उघड होण्यापूर्वी राम मंदिराला दररोज १६ ते १८ लाख रुपयांची देणगी मिळत होती, परंतु हे प्रकरण सार्वजनिक झाल्यानंतर ही रक्कम दररोज २४ ते २६ लाख रुपयांपर्यंत वाढली. त्यांच्या मते, यामुळे दररोज अंदाजे १० लाख रुपयांचा अपहार होत असल्याचा संशय निर्माण होतो. त्यांनी असा आरोप केला की, देशभरातील लाखो भक्तांनी प्रभू रामाच्या मंदिराच्या बांधकामासाठी देणगी दिली, परंतु ट्रस्टने या पैशांचा संपूर्ण आणि पारदर्शक हिशोब सार्वजनिक केला नाही, असेही काँग्रेसने म्हटले आहे.
