अमेरिकेचे राष्ट्राध्यक्ष डोनाल्ड ट्रम्प यांनी इराणबाबत केलेल्या घोषणेने आखातात पुन्हा एकदा युद्धाचे ढग जमले आहेत. ट्रम्प म्हणाले, आता मला इराणसोबत कोणताही करार करायचा नाही. इराणसोबतच्या करारांचे युग आता संपले आहे. तसेच इराणसोबतची शस्त्रसंधीही संपली आहे. त्यांच्या या घोषणेचे परिणाम जगभरात दिसून येत आहे.
प्रसार माध्यमांशी संवाद साधताना ट्रम्प इराणबाबत म्हणाले की, ते आजारी आणि विक्षिप्त लोक आहेत. मला त्यांच्याशी कोणताही व्यवहार किंवा करार करायचा नाही. मला वाटते की इराणसोबतच्या करारांचे युग संपले आहे. तसेच आमची शस्त्रसंधीही संपली आहे. आता इराणसोबत कोणताही करार करण्याची आपली इच्छा नाही. आमच्यासाठी आता हा मुद्दा आता संपला आहे. यावेळी डोनाल्ड ट्रम्प यांनी इराण, नाटो, ग्रीनलँड आणि स्पेनवरही तीव्र टीका केली आहे.
नाटो प्रमुख मार्क रुटे यांच्यासोबतच्या पत्रकार परिषदेत, एका पत्रकाराने ट्रम्प यांना विचारले की इराणसोबतचा युद्धविराम संपला आहे का आणि १४-कलमी सामंजस्य करार (MoU) निष्प्रभ ठरला आहे का. यावर उत्तर देताना, ट्रम्प यांनी थेट सांगितले की, मला वाटते की ते सर्व संपले आहे. मला इराणशी कोणताही व्यवहार किंवा करार करायचा नाही. ते नीच, आजारी आणि विकृत मानसिकतेचे लोक आहेत. त्यांचे नेतृत्व विकृत मानसिकतेचे लोक करतात आणि ते खूप क्रूर व हिंसक आहेत. त्यामुळे आमच्यासाठी शस्त्रसंधी संपली आहे.
इराणवर नुकत्याच झालेल्या अमेरिकेच्या हल्ल्यांबद्दल पत्रकारांशी बोलताना ट्रम्प म्हणाले, काल रात्री आम्ही इराणमधील काही अत्यंत धोकादायक लोकांवर मोठा हल्ला चढवला. काल त्यांनी जहाजांवर रॉकेट डागायला सुरुवात केली. म्हणून आम्ही काल रात्री त्यांच्यावर मोठा हल्ला चढवला.
ट्रम्प यांनी नाटोबद्दलही नाराजी व्यक्त केली. ते म्हणाले की अमेरिकेला अन्यायकारक वागणूक दिली जात आहे आणि अमेरिका नाटोमध्ये आपल्या वाट्यापेक्षा खूप जास्त पैसे देत आहे. ग्रीनलँडच्या मुद्द्यावर, ट्रम्प यांनी सांगितले की हा अमेरिकेसाठी एक मोठा सामरिक प्रश्न आहे. त्यांनी या प्रकरणी नाटोच्या भूमिकेबद्दलही असमाधान व्यक्त केले. स्पेनवर हल्लाबोल करत, ट्रम्प यांनी सांगितले की त्यांना स्पेनसोबत व्यापार करायचा नाही. त्यांनी अमेरिकेचे ट्रेझरी सेक्रेटरी स्कॉट बेझंट यांना स्पेनसोबतचे सर्व व्यापारी संबंध संपवण्याचे आवाहनही केले. डोनाल्ड ट्रम्प यांनी स्पेनला नाटोसाठी “अत्यंत वाईट भागीदार” म्हटले आणि ग्रीनलँड, इराण आणि नाटोशी संबंधित अनेक मुद्द्यांवरील सध्याच्या परिस्थितीबद्दल ते नाखूश असल्याचे सांगितले.
इराणी राजवट आणि आयआरजीसीच्या निवेदनाची वाट पाहत असताना, वॉशिंग्टनने या प्रदेशात नवीन हल्ले केल्यानंतर अमेरिका आणि इराण यांच्यात नवीन संघर्ष सुरू झाला आहे. अमेरिकेच्या सेंट्रल कमांडने एका निवेदनात म्हटले आहे की, वॉशिंग्टनने इराणविरुद्ध ‘आक्रमक हल्ल्यांची’ नवीन फेरी सुरू केली आहे.
सेंटकॉमच्या निवेदनात म्हटले आहे की, अमेरिकी सैन्याने होर्मुझच्या सामुद्रधुनीमध्ये किंवा जवळ इराणच्या हवाई संरक्षण प्रणाली, कमांड आणि कंट्रोल नेटवर्क, किनारी रडार केंद्रे, जहाजविरोधी क्षेपणास्त्र क्षमता आणि इस्लामिक रिव्होल्यूशनरी गार्ड कॉर्प्सच्या ६० हून अधिक लहान बोटींवर हल्ला केला, ज्यामुळे आंतरराष्ट्रीय व्यापार मार्गाद्वारे आंतरराष्ट्रीय व्यापारावर हल्ले करण्याची इराणची क्षमता कमी झाली आहे, असा दावा करण्यात आला आहे.
