सोनम वांगचुक यांच्या पत्नी गीतांजली आंगमो यांनी मंगळवारी दिल्ली उच्च न्यायालयाच्या निर्णयाचे स्वागत केले. न्यायालयाने वांगचुक यांना सफदरजंग रुग्णालयातून मेडांटा रुग्णालयात हलवण्याचे आदेश दिल्यानंतर त्यांनी ही प्रतिक्रिया दिली. सफदरजंग रुग्णालयात वांगचुक यांना “स्थानबद्ध केल्यासारखे” वाटत होते, असा आरोपही त्यांनी केला.
पत्रकारांशी बोलताना गीतांजली आंगमो म्हणाल्या, “मी दिल्ली उच्च न्यायालयाचे आभार मानते. लोकशाही देशात प्रत्येक नागरिकाला स्वतःचा डॉक्टर, रुग्णालय आणि उपचारपद्धती निवडण्याचा अधिकार आहे. मात्र त्यांना ज्या पद्धतीने रुग्णालयात आणण्यात आले, त्यामुळे आमचा विश्वास उडाला होता.”
त्या पुढे म्हणाल्या, “वांगचुक यांना रुग्णालयात दाखल करण्याची गरज नव्हती. जंतर-मंतरवरच त्यांच्या प्रकृतीवर देखरेख ठेवता आली असती. त्यांना बाहेरील लोकांशी संपर्क साधता येऊ नये म्हणूनच रुग्णालयात ठेवण्यात आले होते. त्यांच्या प्रकृतीची कोणतीही बाब जीवाला धोका निर्माण करणारी नाही. सरकारपेक्षा आम्हालाच त्यांच्या आरोग्याची अधिक चिंता आहे.”
गीतांजली आंगमो यांनी सांगितले की, विद्यार्थ्यांवर झालेला लाठीचार्ज आणि अश्रुधूराच्या वापराच्या निषेधार्थ सोनम वांगचुक यांनी उपोषण सुरू ठेवण्याचा निर्णय घेतला आहे. सफदरजंग रुग्णालयात भेटीसाठी आलेल्या अनेक खासदारांना वांगचुक यांची भेट घेण्याची परवानगी देण्यात आली नाही. “गेल्या 20 दिवसांपासून त्यांच्यावर उपचार करणारे डॉ. लांबा आणि डॉ. दिघे यांनी न्यायालयात सांगितले की, उपचार करणाऱ्या डॉक्टरांनाही रुग्णाची भेट घेऊ दिली जात नव्हती. त्यामुळे त्या रुग्णालयात आम्हाला स्थानबद्ध आणि कैदेत असल्यासारखे वाटत होते,” असे त्या म्हणाल्या.
न्यायालयाचा लेखी आदेश मिळाल्यानंतर दुपारी वांगचुक यांना मेडांटा रुग्णालयात हलवण्यात येईल, असेही त्यांनी स्पष्ट केले. संसदेने विद्यार्थ्यांच्या मागण्यांवर लक्ष देईपर्यंत सोनम वांगचुक यांचे उपोषण सुरूच राहील, असे गीतांजली आंगमो यांनी पुन्हा एकदा स्पष्ट केले. “विद्यार्थ्यांवर झालेल्या अमानुष मारहाण आणि अश्रुधूराच्या वापराच्या निषेधार्थ तसेच विद्यार्थ्यांशी एकजूट दर्शवण्यासाठी ते उपोषण सुरू ठेवणार आहेत. संसद विद्यार्थ्यांचे म्हणणे ऐकेपर्यंत हे उपोषण सुरू राहील,” असेही त्यांनी यावेळी नमूद केले.
